ദക്ഷിണ കേരളത്തിൽ കഥകളി മേളത്തിന് വാരണാസി സഹോദരന്മാർ എന്ന് അറിയപ്പെട്ടിരുന്നത് പോലെ തന്നെ കഥകളി സംഗീതത്തിന് വൈക്കം സഹോദരന്മാർ എന്ന് അറിയപ്പെട്ടിരുന്ന ഒരു കാലം ഉണ്ടായിരുന്നു. ശ്രീ. വൈക്കം തങ്കപ്പൻ പിള്ള ചേട്ടനും ശ്രീ. വൈക്കം പുരുഷോത്തമൻ ചേട്ടനും ഒന്നിച്ചുള്ള ധാരാളം അരങ്ങുകൾ ഓർമ്മയിൽ ഉണ്ട്. പ്രത്യേകിച്ചും ഹരിശ്ചന്ദ്രചരിതം കഥ.  
എന്റെ വളരെ ചെറുപ്പ കാലത്ത്  ഒരിക്കൽ  എന്റെ ഗ്രാമമായ ചെന്നിത്തലയിൽ അദ്ദേഹം സഹോദരനോടൊപ്പം ഒരു ഹരിശ്ചന്ദ്രചരിതം കളിക്ക് പാടാൻ എത്തി. കൊല്ലം ജില്ലയിലെ ഒരു കളി കഴിഞ്ഞ് ചെങ്ങന്നൂര് ആശാനും, കൃഷ്ണൻ നായര് ആശാനും കൂടെ ഉണ്ടായിരുന്നു. അന്ന് ഞങ്ങളുടെ വീട് ഒരു കുടിൽ ആയിരുന്നു. അച്ഛൻ വടക്കൻ പറവൂരിൽ ഒരു കളിക്ക് പോയി മടങ്ങി എത്തിയിട്ടില്ല.  ഈ നാലുപേരെ സ്വീകരിച്ച് അവര്ക്ക് കിടക്കാൻ ഒരു ഇടം ഞങ്ങളുടെ വീട്ടില് ഇല്ലായിരുന്നു.

ആസ്ബെസ്റ്റോസ് ഷീറ്റിട്ട വരാന്തയിൽ തങ്കപ്പൻ പിള്ള ചേട്ടനും പുരുഷോത്തമൻ ചേട്ടനും ഇടം പിടിച്ചു. ആയിടെ പണി കഴിപ്പിച്ച എരുത്തിലിന്റെ തിണ്ണയ്ക്ക് ഗുരു ചെങ്ങന്നൂരും. വൈക്കോൽ തുറുവിന്റെ നിഴൽലഭിക്കുമ്പോൾ കട്ടിൽ മാറ്റി മാറ്റിയിട്ട് വിശ്രമിക്കുന്ന കൃഷ്ണൻ നായര് ആശാനും. അച്ഛൻ എത്തുമ്പോൾ മണി നാല്. തന്റെ സഹപ്രവർത്തകർക്ക് കിടക്കാൻ നല്ലൊരിടം തന്റെ വസതിയിൽ ഇല്ലാത്ത ഖേദം അദ്ദേഹത്തിനു ഉണ്ടായി. എല്ലാരും ഉണരുമ്പോൾ കാപ്പി കൊടുക്കുക. ഞാൻ കളി സ്ഥലത്തേക്ക് പോയി എന്ന് അവരോടു പറയുക എന്ന് അമ്മയെ അറിയിച്ചു അച്ഛൻ കളി സ്ഥലത്തെക്ക് പോയി.
എല്ലാവരും ഉണർന്ന് കാപ്പി കുടിയും കഴിഞ്ഞ് കളിസ്തലത്തെക്ക് യാത്രയായി. ഈ കളിയുടെ അടുത്ത നാൾ തന്നെ അച്ഛൻ വീടിന്റെ പണിയുടെ തുടക്കം കുറിച്ചു.
ശ്രീ. തങ്കപ്പൻ പിള്ള ചേട്ടനെ പിന്നീട് കാണുമ്പൊൾ എല്ലാം അന്നത്തെ ഞങ്ങളുടെ വീട്ടിലെ ആഹാരത്തിന്റെ രുചിയെ പറ്റി പറയുമായിരുന്നു. പുതിയ കഥകളുടെ അവതരണത്തിൽ അദ്ദേഹം ധാരാളം സംഭാവനകൾ നല്കിയിട്ടുണ്ട്. ശ്രീ. കളർകോട് നാരായണൻ നായര് അവര്കളുടെ കഥകൾ ചിട്ട ചെയ്തു അദ്ദേഹം പാടി കേട്ടിട്ടുണ്ട്.
അദ്ദേഹത്തെ ഏറ്റവും അവസാനമായി കണ്ടത് ശ്രീ. മാത്തൂർ ഗോവിന്ദൻ കുട്ടി ചേട്ടന്റെ ജന്മനാൾ ആഘോഷത്തിനാണ്. അന്ന് അദ്ദേഹവുമായി ധാരാളം സംസാരിക്കുവാൻ സാധിച്ചു.
ശ്രീ. തങ്കപ്പൻ പിള്ള ചേട്ടൻ ഒരു തികഞ്ഞ സത്യസായി ഭക്തനായിരുന്നു. അദ്ദേഹത്തിൻറെ വീട്ടില് പോയിട്ടില്ല. വൈക്കം  ശ്രീ. പുരുഷോത്തമൻ ചേട്ടന്റെ വീട്ടില് രണ്ടു തവണ പോയിട്ടുണ്ട്.
പരേതനായ ശ്രീ.  തങ്കപ്പൻ പിള്ള ചേട്ടന്റെ ആത്മാവിനു നിത്യശാന്തി നേരുകയും    അദ്ദേഹത്തിൻറെ അരങ്ങുകളെ മനസാ സ്മരിക്കുകയും ചെയ്യുന്നു.

ഈ കഥകളി സന്ഗീതജ്ജനെ കാണാനോ അദ്ദേഹത്തിൻറെ പാട്ട് കേൽക്കുവാനോ എനിക്കവസരം ഉണ്ടായിട്ടില്ല. ആദരാഞ്ജലികൾ.