സതിയുടെ കോപവാക്കുകള്‍ കേട്ട് ഉള്ളില്‍ സന്തോഷം തോന്നിയ വൃദ്ധ ബ്രാഹ്മണന്‍ ശ്ലോകാരംഭത്തോടെ എഴുന്നേറ്റ് "ഇനി സ്വന്തം രൂപത്തില്‍ പ്രത്യക്ഷപ്പെടുക തന്നെ" എന്ന് മുദ്ര കാണിച്ച് "ഭഗവാന്‍ മഹേശന്‍" എന്നതിനോടൊപ്പം പിന്നിലേക്ക്‌ മറയുന്നു. അതെ സമയത്ത് തന്നെ " ഇനി ഇവിടെ നില്‍ക്കാന്‍ വയ്യ" എന്ന് മുദ്ര കാണിച്ച് സതി പിന്തിരിയുന്നു. ആ സമയത്ത് " ആവിര്‍ഭവിച്ചു" എന്നതിനൊപ്പം വലന്തല നാദം, ശംഖ്,ആലവട്ടം, മേലാപ്പ് എന്നിവയോടെ വലതുവശത്ത്‌ ഇരുന്നുകൊണ്ട് ശിവന്‍ പ്രത്യക്ഷപ്പെടുന്നു. സതി ഭഗവാനെക്കണ്ട് നമസ്കരിക്കുന്നു. ശിവന്‍ അനുഗ്രഹിക്കുന്നു. സതി എഴുന്നേറ്റ് തല താഴ്ത്തി നില്‍ക്കുന്നു.