വാനിനൊത്തു വിളങ്ങുന്ന വാനോരാറ്റിൽ
ആട്ടക്കഥ:
ശ്രീരാമദൂതനിദമോതി നടന്നു ഗംഗാ-
തീരത്തു ചെന്നളവഹോ! ബഹു ദാശവർഗ്ഗം
പാരാതെ തത്ര വലവീശുവതിന്നു മറ്റേ-
ത്തീരത്തു വഞ്ചികളിൽ വന്നു നിരന്നു മോദാൽ
വാനിനൊത്തു വിളങ്ങുന്ന വാനോരാറ്റിൽ വലയിട്ടു-
മീനങ്ങൾ പിടിക്കുമീ മാനുഷർക്കെല്ലാം
ഊനമറ്റ മറകട്ട ദാനവനെക്കൊൽവാനൊരു-
മീനമായ ദാനവാരി തുണച്ചീടേണം
മന്ദരാദ്രിയുയർത്തുവാൻ മന്ദമന്യേ കൂർമ്മമായി
വന്ന വിഷ്ണുഭഗവാനെ വണങ്ങീടുന്നേൻ
ധാത്രിയെക്കട്ടദൈത്യന്റെ മൂർത്തി പിളർന്നീടാനൊരു-
പോത്രിയായ പരമനെ പണിഞ്ഞീടുന്നേൻ
ദനുജേന്ദ്ര വധത്തിനു പുനരൊരു നരസിംഹ-
തനുവായ തമ്പുരാനെ തൊഴിതീടുന്നേൻ
കേമനായ ബലിയോടു ഭൂമിയെ വീണ്ടെടുത്തീടാൻ
വാമനനായ് വന്നവനെ വണങ്ങീടുന്നേൻ
ഭൂതലത്തിൽ പുകൾന്നേറ്റം പൂതമായ ഭൃഗുവംശേ
ജാതനായ ജഗന്നാഥൻ ജയിച്ചീടട്ടെ!
സൂര്യവംശേ ദശരഥ സൂനുവായി ജനിച്ചൊരു-
വീര്യമേറും വിഷ്ണുവെ കൈവണങ്ങീടുന്നേൻ!
അരങ്ങുസവിശേഷതകൾ:
വഞ്ചിപ്പാട്ട് രൂപത്തിൽ ആണ് ഇത്. ധിത്തിത്താരാ ധിത്തൈ ധിത്തത്ത ധിത്തൈ എന്ന പോലെ. വഞ്ചിക്കാർ കാണികൾക്കിടയിലൂടെ പാട്ടുപാടി, വഞ്ചിതുഴഞ്ഞ രംഗത്തേക്ക് പോകുന്നു.
വഞ്ചി രംഗത്തെത്തുമ്പോൾ ഹനൂമാൻ മെല്ലെ പ്രവേശിച്ച് വഞ്ചിപിടിച്ച് കുലുക്കുന്നു. മുക്കുവരെ പേടിപ്പിച്ച് ഓടിപ്പിക്കുന്നു.
തിരശ്ശീല