പദസാരം:-ഗാന്ദിനീനന്ദനനായ അക്രൂരൻ ആനന്ദത്തോടുകൂടി മെല്ലെ സഞ്ചരിച്ചുകൊണ്ട് സന്തോഷപൂർവ്വം ആനന്ദമൂർത്തിയായ ശ്രീകൃഷ്ണനെ ചിന്തിച്ചു. ഹോ! ആനന്ദമുണ്ടാക്കുന്നവരായ ശ്രീകൃഷ്ണബലരാമന്മാരെ  ഇന്ന് കാണാം. ഏറ്റവും ശുഭമായതിനെ ഭജിക്കുന്നു. ചലിക്കുന്ന രത്നകുണ്ഡലങ്ങളാലും, പുഞ്ചിരിയാലും, കടാക്ഷത്താലും ശോഭിക്കുന്നതായ ആ തിരുമുഖം കാണുന്നുണ്ട്. ഗോപികകളുടെ കുചങ്ങളിലെ കുങ്കുമത്താൽ ശോഭിക്കുന്നതായ തിരുമാറും, ശോഭനമായ കടീതടവും കാണുന്നുണ്ട്. ശിവനാലും, ബ്രഹ്മാവിനാലും, ഇന്ദ്രനാലും വന്ദിക്കപ്പെടുന്നവയായ ശ്രീകൃഷ്ണപാദങ്ങളും കാണുന്നുണ്ട്. ദുർമ്മനസ്സായ കംസൻ തീർച്ചയായും എനിക്ക് നന്മയാണ് ചെയ്തത്. അതിനാൽ ആനന്ദസ്വരൂപനായ ശ്രീകൃഷ്ണനെ സുഖമായി കാണുവാൻ സംഗതിയായി. 'അക്രൂരാ, വന്നാലും' എന്നുപറഞ്ഞ് തൃക്കൈകൊണ്ട് പിടിച്ചിരുത്തി ആ താമരക്കണ്ണൻ എന്നെ സൽക്കരിക്കും. ഇപ്രകാരം ചിന്തിച്ചുകൊണ്ട് ഗോകുലത്തിൽ ചെന്നസമയത്ത് ദേവദേവന്മാരെ കണ്ട് അക്രൂരൻ വേഗത്തിൽ കൈവണങ്ങി.