പ്രഭാതമെത്തീ ഗുരു ശിഷ്യരോടും

പ്രസന്നഭാവേന നടന്നുനീങ്ങീ

പ്രതിജ്ഞപോൽ നല്‍കിയ ചുംബനത്താൽ

പ്രകോപിതൻ മന്നനുരച്ചിതേവം
 

ഉചിതമുചിതമേറ്റം കുശലമതേ

സചിവനതാക്കും നിന്നെ ഞാൻ

സപരിതോഷം കൈക്കൊണ്ടാലും

സപദി ഗൂഢം പൊയ്ക്കൊണ്ടാലും

ആഹാ! നീ അറിയും നന്നായ്‌

അഹങ്കാരിയാം അവനെ!?

മോഹങ്ങൾ സര്‍വ്വം നേടാൻ

ഭാഗധേയം ഭവിച്ചു തേ!!

ആരാണവൻ  ചൊല്ലെടോ വേഗാൽ

ആരാണീ മൂഢമാന്ത്രികൻ ?

ആശാരിച്ചെറുക്കനൊരുവൻ - വാശിയോടേ

ആശാന്തരങ്ങളിൽ എങ്ങും നടന്നഹോ!

ആശയത്തിൽ ഔദ്ധത്യത്തൊടേ - ഏറെ

പേശിടുന്നുണ്ടു നിയമവിരോധം

സഫലമേറ്റം നിൻ പ്രയത്നം

സപദി പോയ്‌ നീ വരുത്തവേണം

കൊതിയനെ മന്ത്രണഗൃഹേ

അതിഗൂഢമായ്‌ ഇരുത്തേണം

പൂജ്യേ! നിനക്കേവം രാജ്യകാര്യമോതാൻ

ലജ്ജയില്ലാതെയായ്‌  വന്നതെത്രയും ചിത്രം!

ചിന്തകളുപേക്ഷിച്ചു അന്ത:പുരത്തിങ്കൽ

പൂന്തേന്മൊഴി! സതതം വാഴ്കെടോ സുഖമൊടേ

(കാലം താഴ്ത്തി) പൂന്തേന്മൊഴി! സതതം വാഴ്കെടോ സുഖമൊടേ

പല്ലവി:

കല്ല്യാണീ! ചൊല്‍ക മമ വല്ലഭേ! കാരണം

അനുപല്ലവി:

വല്ലാതെ വാടുവാൻ തവ സുന്ദരവദനം

ചരണം:

ഉല്ലാസമാര്‍ന്നു മണിമന്ദിരേ രമിപ്പാൻ

എല്ലാം നിൻ കണവൻ ഞാൻ ഒരുക്കിയില്ലേ?

കല്ല്യേ! തവ കദനം എന്തെന്നതറിയുകിൽ

തെല്ലും സന്ദേഹമില്ലാ തീര്‍പ്പനഹം

കാരുണ്യരൂപൻ മിശിഹാ പകര്‍ന്നിടും

നേരുറ്റ വാക്യങ്ങളിൽ ഈറയാര്‍ന്നവൻ

വീറുറ്റ യുദ്ധത്തലവൻ പിലാത്തോസ്‌

ഖേദിച്ചിരിക്കും പ്രിയയോടു ചൊല്ലിനാൻ