അപ്പമായ്‌ വീഞ്ഞായ്‌ ഞാൻ

അവതരിക്കുന്നൂ നിത്യം

എന്നെ ഞാൻ നിന്നിലേയ്ക്കു

പകരുന്നൂ കുര്‍ബാനയിലൂടേ

കുരുതിച്ചോരയിൽ ഇനിയൊരു

കുഞ്ഞുറുമ്പും പൊലിയേണ്ടാ

സര്‍ഗ്ഗക്രിയകളിലൂടേ സ്വര്‍ഗ്ഗസൌഖ്യം

പുലരട്ടേ ഭൂവിലെങ്ങും!

തിരുമിഴി തുറന്നൂ ശീർഷം നിവര്‍ന്നൂ

തൃക്കൈകൾ രണ്ടും ഉയര്‍ന്നൂ

ജനപരമ്പരകളാം കുഞ്ഞാടുകള്‍ക്കവൻ

ജനകനായ്‌ ഇടയനായ്‌ അരുളീ വാക്യം

ഒറ്റിക്കൊടുക്കുവാൻ രക്തചുംബനം നല്‍കാൻ

മുറ്റും കരുത്തുവേണ്ടേ യൂദാസേ! പാനംചെയ്ക!
 

(പത്രോസിന്റെ നേരെ തിരിഞ്ഞ്‌)

നാളെ മൂന്നുരു എന്നെ തള്ളിപ്പറയും നീ

ആവോളം ശക്തി അതിന്നാർജ്ജിക്ക ഭുജിക്ക!

സ്നേഹമൊന്നുതാനെന്റെ സിരകളിൽ ഒഴുകുന്നൂ

സദയം സ്വീകരിപ്പിനിതു സധീരം പാനംചെയ്യുവിൻ

നിറയട്ടെ നിങ്ങളിൽ ഞാൻ അപ്പമായ്‌ വീഞ്ഞായ്‌

ഉറയട്ടെ രക്തമായ്‌ വളരട്ടെ വിനയമായ്‌

വേര്‍തിരിവേതുമില്ലാ വേഷപ്പകിട്ടും വേണ്ടാ

ഏവര്‍ക്കൂമോതിടാം സ്വാഗതം മോദമോടേ.

മേലങ്കി വേണ്ടിനി കച്ചയിതേ പോരും

മേലിലെന്‍പ്രിയരെ പച്ചയായറിയുവാൻ

ക്ഷോഭമില്ലാരോടും ക്ഷീണിതരേവരും

ക്ഷോണിയിൽ സർവ്വരും ക്ഷേമമായ്‌  വാഴേണം