ശ്രീ.കൃഷ്ണൻ നമ്പൂതിരി:  അദ്ദേഹം എത്രയും വേഗം അത് പാടി എനിക്ക് എത്തിക്കാം എന്ന്  പറഞ്ഞിട്ടുണ്ട്. എല്ലാവർക്കും കേൾക്കാൻ വേണ്ടി വെബ്സൈറ്റിൽ ഇടാൻ കൂടി ആണെന്ന് പറഞ്ഞപ്പോൾ അത് ഭംഗിയായി പാടി റെക്കോർഡ്‌ ചെയ്തു എടുക്കണം എന്നാണ് അദ്ദേഹത്തിൻറെ താത്പര്യം. ഇതിനായി ചില ദിവസങ്ങൾ  കാത്തിരിക്കേണ്ടി വരും. അദ്ദേഹം 'begada' യിലുള്ള ആ പദങ്ങൾ എല്ലാം തന്നെ വളരെ മനോഹരമായി എന്നെ പാടിക്കേൾപ്പിക്കയും ചെയ്തു. അദ്ദേഹത്തിൻറെ ഫോണ്‍ നമ്പർ കഥകളി.ഇൻഫോ പ്രൊഫൈലിൽ ഉണ്ട്.

രണ്ടു ദിവസങ്ങൾക്കു മുന്പും ഞാൻ ഇക്കാര്യം ഗോപിക്കുട്ടൻ നായരാശാനെ ഓർമ്മിപ്പിച്ചിരുന്നു. ഉടൻ തന്നെ ശെരിയാക്കാം എന്നും പറഞ്ഞു. എന്റെ കയ്യിൽ കിട്ടിയാൽ അന്ന് തന്നെ ഞാൻ പോസ്റ്റ്‌ ചെയ്യുന്നതായിരിക്കും. 

ശ്രീ. കൃഷ്ണൻ നമ്പൂതിരി: ശ്രീ. ഗോപിക്കുട്ടൻ നായർ പാടിയ 'മന്ദം മന്ദമാക്ക ബാഹുക' എന്ന പദം താഴെക്കൊടുത്തിരിക്കുന്ന ലിങ്കിൽ കൊടുത്തിട്ടുണ്ട്. ഈ പദം മേളത്തോടെ പാടി റെക്കോർഡ്‌ ചെയ്യണം എന്നാണു ഗോപിക്കുട്ടൻ ആശാൻ ആഗ്രഹിച്ചിരുന്നത്. അതിനുള്ള ഒരു സാഹചര്യം അദ്ദേഹത്തിനു കിട്ടിയില്ല. പിന്നെ എന്റെ നിര്ബന്ധപ്രകാരം ഒന്ന് പാടി കിട്ടിയതാണ് താഴെക്കാണുന്ന ലിങ്കിൽ കൊടുത്തിരിക്കുന്നത്. മേളത്തോടെ പാടിക്കിട്ടുമ്പോൾ അത് കഥകളിപദം.കോം അപ്ലോഡ് ചെയ്യാം.  
http://dhanyaasi.blogspot.in/2013/11/blog-post_28.html
 

 
Please see the link.
http://dhanyaasi.blogspot.in/2013/11/blog-post_28.html
 

കൃഷ്ണന്‍ നായരാശന്റെ ആട്ടപ്രകാരത്തിലും, പന്മനസാറിന്‍റെ കൈരളീ വ്യാഖ്യാനത്തിലും ശ്രീ ഗോപിക്കുട്ടന്‍ നായര്‍  പാടിയപോലെ ഇങ്ങനെയാണ്പദം.                                                                                                                                                                     "അന്തിയാം  മുന്‍പേ കുണ്ടിനം തന്നില്‍ ചെന്നുചേരേണമെങ്കില്‍"

രഞ്ജിനി നായർ പറഞ്ഞതുപോലെ "അന്തിയാം  മുന്‍പേ കുണ്ടിനം തന്നില്‍ ചെന്നുചേരേണമെങ്കില്‍" എന്നാണു പ്രസ്തുത ഗ്രന്ഥങ്ങളിൽ എഴുതിയിട്ടുള്ളത്. പക്ഷെ ദേശമംഗലം രാമവാര്യരുടെ 'നളചരിതം ആട്ടക്കഥ' യിൽ "അന്തിയാം  മുന്‍പേ കുണ്ടിനം തന്നിൽച്ചേരണമെങ്കിൽ" എന്നാണു കാണുന്നത്. ഇരിങ്ങാലക്കുട സംരംഭകർ ഈ ഗ്രന്ഥമോ ഇതുപോലെയുള്ള   മറ്റേതെങ്കിലും ഗ്രന്ഥമോ ആയിരിക്കും അവലംബമാക്കിയിട്ടുള്ളത്. 
 
ശ്രീ. ഗോപിക്കുട്ടൻ നായർ അദ്ദേഹത്തിൻറെ ഗുരുനാഥന്മാരിൽ നിന്നും പഠിച്ചിരിക്കുന്നത് '... ചെന്നുചേരേണമെങ്കില്‍' എന്നാണ്‌. '....ചെന്നു ചേരേണം, അതെങ്കിൽ എന്തിനുണ്ടാക്കുന്നു..' എന്ന രീതിയും സ്വീകരിച്ചിരുന്നത്രേ. ഗോപിക്കുട്ടൻ ആശാന്റെ ഗുരുപരമ്പര നീളുന്നത്, നളചരിതം ആട്ടക്കഥ കഥകളിയാക്കിയ തെക്കൻ കഥകളി രംഗത്തിലെ ആചാര്യവര്യന്മാരിലേക്കാണ്.  അതായത് നളചരിതം ആട്ടക്കഥ കഥകളിയാക്കിയവർ തുടങ്ങി ഇങ്ങനെയാണ് പാടിയിരുന്നത്. ഉണ്ണായി വാരിയർ കഥ എഴുതിയതിനു ശേഷം അതിന് ഏറ്റവും അടുത്ത കാലത്ത് നടന്നിട്ടുള്ള ഈ രംഗാവതരണങ്ങളിൽ ' ..ചെന്നുചേരേണമെങ്കില്‍' എന്നാണ്‌ പാടിയിരുന്നതെങ്കിൽ, ഉണ്ണായി ഇങ്ങിനെയായിരിക്കണം കഥയിൽ എഴുതിയിരുന്നതെന്ന് സ്വാഭാവികമായും അനുമാനിക്കാം. പിന്നെ എങ്ങിനെ 'ചെന്നു', പദത്തിൽ നിന്നും മാറിപ്പോയി എന്ന് ചിന്തിച്ചാൽ, കാലാകാലങ്ങളായി പല കഥകളി പദങ്ങലിലും കടന്നു കൂടിയിട്ടുള്ള അബദ്ധങ്ങളിൽ ഇതും ഒന്ന് എന്ന് പറയാം എന്നു മാത്രം. നാലാം ദിവസത്തിലെ 'മരണം', 'മാരണം' ആയി ഇപ്പോൾ അരങ്ങു തകർക്കുന്നതു പോലെ! പലരും എഴതി എഴുതി വരുന്ന വഴിയിൾ ഏതോ ഒരു വിദ്വാന് അറിഞ്ഞോ അറിയാതെയോ ഒരു തെറ്റ് പറ്റിയിരിക്കാം. പിന്നാലെ വരുന്നവർ അത് ഏറ്റു പാടും. അങ്ങിനെ പല വാക്കുകളും കഥകളിപദങ്ങളിൽ മാറിപ്പോയിട്ടുണ്ട്.   

ഇനി 'കുണ്ടിനം തന്നില്‍ ചെന്നുചേരേണമെങ്കില്‍" എന്നുള്ളതും 'കുണ്ടിനം തന്നിൽച്ചേരണമെങ്കിൽ' എന്നുള്ളതും ഭാഷാപരമായി ഒന്ന് നോക്കാം. 'ചേരുന്നേൻ ഭവാനോട് കൂടി ഞാൻ' എന്നു മോഹിനി പറയുമ്പോൾ ശരിയാണ്, സ്ത്രീ പുരുഷനോട് ചേരുന്നു. ഞാൻ ഇവിടെ 'എത്തി ചേർന്നു' ; 'അയാൾ അവിടെ ചെന്നു ചേർന്നു' എന്നൊക്കെയാണല്ലോ മലയാള ഭാഷാപ്രയോഗങ്ങൾ? ഞാൻ ഇവിടെ 'ചേർന്നു', അയാൾ അവിടെ 'ചേർന്നു' എന്നൊക്കെ പറയുമോ? അങ്ങിനെ പറഞ്ഞാൽ  വല്ല സ്കൂളിലോ മറ്റോ ചേർന്നെന്നു പറയുംപോലെയാകില്ലേ? അതുകൊണ്ട് ഭാഷാപരമായി 'കുണ്ടിനം തന്നില്‍ 'ചെന്നുചേരുക' തന്നെ വേണം. ഉണ്ണായി വാരിയർ ശരിയായിട്ടായിരിക്കണം എഴുതിയത്. അദ്ദേഹത്തിനു തെറ്റ് പറ്റിയിട്ടുണ്ടെങ്കിൽ അതിനു പിറകെ വന്നവർ ആ തെറ്റ് തിരുത്തിയിരുന്നു എന്നു ചിന്തിക്കാം. അർത്ഥത്തിന്റെയും താളത്തിന്റെയും കാര്യത്തിൽ 'ചെന്നു' ആവശ്യമായി വരുമ്പോൾ, അതില്ലാത്ത ഒരു സാഹിത്യം ഉപയോഗിക്കേണ്ട സാഹചര്യം എങ്ങിനെ വന്നു എന്ന ചോദ്യം അവശേഷിക്കുന്നു. പന്മന സാറിന്റെ പുസ്തകമോ കൃഷ്ണൻ നായർ ആശാന്റെ ആട്ടപ്രകാരമോ ഒന്ന് നോക്കിയിരുന്നെങ്കിൽ ഇവിടെ ഉണ്ടായ ബുദ്ധിമുട്ടുകൾ ഒഴിവാക്കാമായിരുന്നു.

പത്തു നൂറു വർഷങ്ങൾക്ക് മുൻപ് അന്തസ്സായി ചെയ്തു വച്ച ഒരു പദത്തിൽ കിടന്നു നളചരിത പരിഷ്ക്കർത്താക്കൾ കഷ്ട്ടപ്പെട്ടതിനു കാരണം, വ്രണിതഹൃദയരായ ആചാര്യപരമ്പരയുടെ അപ്രീതി ഒന്നു മാത്രമാണെന്നേ ചിന്തിക്കാൻ കഴിയൂ.  ആചാര്യ- ദേവാനുഗ്രഹങ്ങൾക്കും ഗുരുത്വത്തിനും വളരെ പ്രാധാന്യം കല്പ്പിക്കുന്ന ഒരു പാരമ്പര്യ കലയാണല്ലോ കഥകളി.

ശ്രീ. കൃഷ്ണൻ നമ്പൂതിരി:
എന്റെ അറിവിലും ബോധത്തിലും ശരിയെന്നു തോന്നിയതാണ് ഞാൻ എഴുതിയത്. ഞാൻ ഒരു മലയാളം മുൻഷി അല്ലാത്തതിനാൽ മലയാള ഭാഷാ പ്രയോഗങ്ങളെക്കുറിച്ചു കൂടുതൽ ഒന്നും പറയാൻ എനിക്ക് കഴിയില്ല. അറിവുള്ളവർ ചിന്തിച്ചു ശരിയെന്നു തോന്നുന്നത് എടുത്തുകൊള്ളട്ടെ. സാഹചര്യ തെളിവുകളുടെ അടിസ്ഥാനത്തിലുള്ള അനുമാനം അത്ര അശാസ്ത്രീയം ഒന്നുമല്ല; പ്രത്യേകിച്ചും കൃത്യതയോടെ പറയാൻ കഴിയാത്ത ചരിത്ര സംഭവങ്ങളിൽ. ഉണ്ണായി വാരിയർക്കെന്നല്ല, ഏതു മഹാപണ്ടിതനും ചെറിയ തെറ്റുകൾ സംഭവിക്കാം. അത് പറയുന്നതിൽ സാഹസികത്തത്തിന്റെ കാര്യമൊന്നും ഇല്ല. എന്നു പറയുമ്പോൾ പോലും ഇവിടെ പരാമർശന വിധേയമായ കാര്യത്തിൽ ഉണ്ണായി വാരിയരുടെ കാവ്യം പിൽക്കാലങ്ങളിൽ പകർത്തി എഴുതിയവർ ആരെങ്കിലും ആകും തെറ്റുകാർ എന്നു വിശ്വസിക്കാനാണ് എനിക്ക് കൂടുതൽ ഇഷ്ടം. ദേശമംഗലം രാമവാരിയർ അദ്ദേഹത്തിൻറെ ഗ്രന്ഥം രചിച്ചിട്ടുള്ളത് 1945 ലാണ്. ഇതിനും അമ്പതു വർഷങ്ങൾക്കു മുന്പെങ്കിലും തെക്കൻ ഗായകർ  പാടിയിരുന്നത് '.....ചെന്നു ചേരേണമെങ്കിൽ' എന്നാണു ഞാൻ പറഞ്ഞിരുന്നത്. ഗോപിക്കുട്ടൻ നായരും പന്മന സാറും കലാമണ്ഡലം കൃഷ്ണൻ നായരും എല്ലാം ആ വഴി തുടർന്നു എന്നേ ഉള്ളൂ. അവരൊന്നും അല്ല ആ പദം അങ്ങിനെ ആക്കിയിട്ടുള്ളത്. ഞാൻ ഒരു പണ്ടിതനെയും കുറച്ചു കാണുന്നില്ല. പാണ്ടിത്യത്തെ ബഹുമാനിക്കാനാണ് എനിക്കിഷ്ടം. കഥകളി വിഷയത്തിൽ എനിക്ക് വ്യക്തിപരമായ ഇഷ്ട്ടാനിഷ്ടങ്ങൾക്കും മുകളിലാണ് വിഷയഗൌരവം എന്നു കൂടി പറഞ്ഞു കൊള്ളട്ടെ.  

ശ്രീ. കൃഷ്ണൻ നമ്പൂതിരി :  എന്നെക്കുറിച്ച് അങ്ങു പറഞ്ഞ നല്ലവാക്കുകൾക്ക് നന്ദി.
 
ഒരു പദത്തെ ആലാപനസൌകര്യത്തിനായി മുറിച്ചു പാടുന്ന രീതി കഥകളിയിൽ സർവസാധാരണമാണ്.ഇതിനു എത്ര ഉദാഹരണങ്ങൾ വേണമെങ്കിലും നിരത്താൻ കഴിയും. അങ്ങിനെ മുറിച്ചു പാടുന്നതിൽ ഭാഷാപരമായി തെറ്റില്ലെങ്കിൽ കുഴപ്പമൊന്നുമില്ല. "അന്തിയാം മുമ്പേ കുണ്ഡിനം തന്നില്‍ ചെന്നു ചേരേണമെങ്കിലെന്തിനുണ്ടാക്കുന്നു കാലവിളംബന കാരണം?" എന്നുള്ളത് , "ചെന്നു ചേരേണം, അതെങ്കിൽ എന്തിനുണ്ടാക്കുന്നു.." എന്ന് പാടുന്നത് അങ്ങിനെ ഒരു രീതിയെന്നേ ധരിക്കേണ്ടതുള്ളൂ. ഗായകൻ ഇങ്ങിനെ പാടുന്നു എന്നതുകൊണ്ട്‌ സാഹിത്യം അങ്ങിനെയാകണം എന്നില്ല.
 
പദം എങ്ങിനെ പാടിയാലും 'ചെന്നു' അവിടെ തന്നെയുണ്ട്‌. അതിൽ മാറ്റം വരുന്നില്ല. സാഹിത്യത്തിന്റെ ഭാഗം മാറിയാൽ അർത്ഥവും മാറും.
 
കേരളത്തിൽ അങ്ങോളമിങ്ങോളം പതിറ്റാണ്ടുകളായി നൂറു കണക്കിനു കഥകളി ഗായകരിലും താളിയോല ഗ്രന്ഥങ്ങളിലും അച്ചടിശാലകളിലും ദേശ-ഭാഷാ-സംസ്കാര വ്യത്യസ്തകളിലും കൈകാര്യം ചെയ്യപ്പെട്ടു വരുന്ന കഥകളിപദങ്ങൾക്കു ചെറിയ മാറ്റങ്ങൾ സംഭവിക്കും എന്നത് സ്വാഭാവികമാണ്. ഇതിൽ ഭാഷാപരമായോ സാഹിത്യപരമായോ കഥാപരമായോ ദോഷമില്ലാത്തതും ആലാപന സൗകര്യം ഉള്ളതുമായ പദങ്ങൾ നമ്മുടെ മുൻപിൽ ഉള്ളതു സ്വീകരിച്ചു മുൻപോട്ടു പോകുക എന്നതല്ലേ അഭിലഷണീയം, അഭികാമ്യം? പരിഷ്ക്കാരം എന്നാൽ സംസ്കാരം നഷ്ടപ്പെടുത്താതെ കാലാകാലങ്ങളിൽ വരുന്ന മാറ്റങ്ങളെ ഉൾക്കൊണ്ടു മുന്നോട്ടു പോകുക എന്നാണല്ലോ? ഉണ്ണായി വാരിയരോട് ചോദിച്ചു ശരിതെറ്റുകൾ മനസ്സിലാക്കാൻ കഴിയാത്ത ഒരു കാര്യത്തിൽ, പൂർവസൂരികൾ ചിന്തിച്ചും മനനം ചെയ്തും ഉണ്ടാക്കി വച്ചിട്ടുള്ളത് ആദരവോടെ സ്വീകരിക്കേണ്ട കാര്യമല്ലേ ഉള്ളൂ?മനസ്സ് അൽപ്പമൊന്നു വലുതാക്കിയാൽ അവരുടെയൊക്കെ അനുഗ്രഹവർഷം താനേ വന്നു നിറഞ്ഞു കൊള്ളും. കേവലം ഉപകരണങ്ങൾ ആയ നമ്മൾ എന്തിനു അനാവശ്യമായി ബലം പിടിക്കണം?
 
ഞാൻ യാതൊരു സങ്കുചിത ചിന്തയുമില്ലാതെ, എന്റെ മുൻപിലുള്ള  വിവരങ്ങളുടെ അടിസ്ഥാനത്തിൽ സ്വതന്ത്രമായി ചിന്തിച്ചു മാത്രമേ കഥകളി വിഷയം കൈകാര്യം ചെയ്യൂ എന്ന് ഉറപ്പു തരുന്നു. അതിലുണ്ടാകുന്ന കുറവുകൾ എന്റെ അറിവിന്റെ പരിമിതിയായി ധരിച്ച് ക്ഷമിക്കണം.

ഞാൻ എങ്ങും സത്യസന്ധത അവകാശപ്പെട്ടിട്ടില്ല. എന്റെ സത്യസന്ധതയും ചാരിത്ര്യവും തെളിയിക്കാനുള്ള ഒരു 'സ്മാർത്തവിചാര' സ്ഥലം ഒന്നുമല്ലല്ലോ ഇത്?. ഇവിടെ കഥകളി കാര്യങ്ങളാണ് ചർച്ച ചെയ്യുന്നത്. സങ്കുചിത താത്പര്യങ്ങളും വച്ചു കൊണ്ട് ഓരോരോ പേരുകളിൽ മുഖമില്ലാത്ത ആളുകൾ ചോദിക്കുന്ന ചോദ്യങ്ങൾക്ക് ഉത്തരം പറഞ്ഞുകൊണ്ടിരിക്കാനും കഴിയില്ല.  ഇവിടെ പരാമർശനവിധേയമായ പദത്തെക്കുറിച്ച് എന്തെങ്കിലും സംശയം താങ്കൾക്കുണ്ടെങ്കിൽ അതിനുള്ള ഉത്തരങ്ങൾ എല്ലാം തന്നെ മുകളിൽ നടത്തിയിട്ടുള്ള ചർച്ചകളിൽ കിട്ടും.