തേന്‍മാവിന്‍റെ പൂങ്കുലകളില്‍ നിന്നുതിരുന്ന തേന്‍ നുകര്‍ന്നുമദിച്ച, കുയിലുകളുടെ ചുണ്ടില്‍നിന്നും ഉയരുന്ന പഞ്ചമസ്വരം കൊണ്ട് മനോഹരമായ ഉദ്യാനത്തില്‍ , ഇഷ്ടംപോലെ വിഹരിച്ചിരുന്ന വിരാടരാജാവ് ഒരിക്കല്‍ ഉദിച്ചുയരുന്ന ചന്ദ്രനെക്കണ്ട്  സന്തോഷഭരിതനായി അടുത്തുനില്‍ക്കുന്ന പത്നിമാരോടുപറഞ്ഞു.

അല്ലയോ കാമിനിമാരേ എന്‍റെ വാക്കുകള്‍ കേട്ടാലും. കാമദേവന്റെ വെണ്‍കൊറ്റക്കുട പോലെ ചന്ദ്രന്‍ ഇതാ വിലസുന്നു. തടാകമാകുന്ന സുന്ദരിയുടെ കൈകളാകുന്ന താമരയില്‍ ഏറ്റവും ഭംഗിയുള്ള അരയന്നങ്ങളെ കണ്ടാല്‍ കാമദേവന്‍റെ വെഞ്ചാമരക്കൂട്ടമാണെന്നുതോന്നും.പൂത്തുനില്‍ക്കുന്ന ഈ ഉദ്യാനം, മലയാമാരുതനാകുന്ന ഭടനാല്‍ പരിപാലിക്കപ്പെടുന്ന കാമദേവന്റെ ആയുധപ്പുരപോലെ തോന്നുന്നു. അല്ലയോ ആനകളെപ്പോലെ മനോഹരമായി നടക്കുന്നവരേ, മുല്ലവള്ളിയുടെ നടനഭംഗി കാണുവിന്‍ . നമുക്ക് കാമകേളികള്‍ ചെയ്യാം. മനസ്സില്‍ നാണം കരുതരുത്.