അല്ലയോ ദേവേന്ദ്രപുത്രാ, എന്റെ വാക്കുകൾ കേട്ടാലും. പശുക്കളെ തട്ടിക്കൊണ്ടുപോയശത്രുക്കളെ  യുദ്ധത്തിൽ വേഗം ജയിച്ചാലും. ബന്ധുക്കളെ സംരക്ഷിക്കലാണല്ലോ ക്ഷത്രിയവംശജരുടെ ധർമ്മം. സൂര്യൻ താമരയെ വിടർത്തുന്നതിൽ താല്പര്യമുള്ളവനാണല്ലോ. കൈലാസം കുത്തിയെടുത്ത ലങ്കാധിപതിയായ രാവണനെ ശങ്കയില്ലാതെ കൊന്ന  രഘുരാമന്റെ പാദങ്ങൾ ഓർത്ത്  യുദ്ധത്തിനായി നീ ഗമിച്ചാലും. ഞാൻ പണ്ട് സമുദ്രം ചാടിക്കടന്ന് ലങ്കയിലെത്തി സീതാദേവിയെക്കണ്ട് ചൂഡാമണി വാങ്ങി വിജയശ്രീലാളിതനായി തിരിച്ചെത്തിയത് അദ്ദേഹത്തിന്റെ കൃപകൊണ്ടാണല്ലോ.