ശ്ലോകസാരം:- അനന്തരം അർജ്ജുനന്റെ ജ്യേഷ്ഠനായ ഭീമസേനൻ, വാസഗൃഹത്തിൽ കിടക്കുന്നവനും ധർമ്മസമൂഹത്തിന്റെ ഇരിപ്പിടവും ആയ ആ ധർമ്മപുത്രരെ നമസ്കരിച്ചിട്ട് ആദരവോടെ ഇങ്ങനെ പറഞ്ഞു.

പദസാരം:-വീര്യശൗര്യങ്ങളുടെ സമുദ്രമേ, നിർമ്മലഹൃദയ, മഹാനുഭാവ അവിടത്തെ കാലിണ ഞാൻ വന്ദിക്കുന്നു. ചന്ദ്രവംശദീപമേ അങ്ങ് എന്ത് കാരണത്താലാണ് ക്ഷീണിച്ച ഭാവത്തിൽ കിടക്കുന്നത്? കഷ്ടം! അങ്ങയുടെ മനോഹരമായ താമരപോലുള്ള മുഖം ഇപ്പോൾ മ്ലാനമായി കാണുന്നതെന്തിന്? എന്ത് കാരണമുണ്ടായി? പറയണം.