ശ്ലോകർത്ഥം: രാജാക്കന്മാരുടെ എഴുന്നള്ളത്തിലെ ഭേരീനാദങ്ങൾകൊണ്ട്‌ ദിങ്മണ്ഡലം മുഖരിതമായപ്പോൾ ദൂതൻ മുഖേന ക്ഷണിക്കപ്പെട്ട നളനും സ്വയം തീർച്ചയാക്കികൊണ്ടു പുറപ്പെട്ടു. വൻതേരിലേറിവരുന്ന, വിശിഷ്ടാഭരണങ്ങൾകൊണ്ടു പ്രകാശിക്കുന്ന, ഇവനോട്‌ ഇന്ദ്രൻ, ദമയന്തീസവിധത്തിലേക്ക്‌ ഇവനെ അയയ്ക്കാൻ ഉദ്ദേശിച്ചുകൊണ്ട്‌ ഇങ്ങനെ പറഞ്ഞു.

സാരം: ഞാൻ അന്വേഷിച്ചു നടന്ന വള്ളി എന്റെ കാലിൽത്തന്നെ ചുറ്റിയിരിക്കുന്നു. നളന്റെ നികടത്തിലേക്കു നാം പുറപ്പെട്ടു. നളനിതാ നമുക്കു നേരേ വന്നിരിക്കുന്നു. ശത്രുക്കളെ നശിപ്പുക്കുന്നതിൽ കാട്ടുതീപോലെയായിരുന്ന നിഷധരാജാവ്‌ വീരസേനൻ ഞങ്ങൾക്ക്‌ അതിപരിചിതനാണ്‌. അതിനാൽ അദ്ദേഹത്തിന്റെ പുത്രനായ നിന്നെയും ഞങ്ങൾ അറിയും. നളനല്ലയോ നീ ?