ശ്ലോകാർത്ഥം: ഇപ്രകാരം ദേവശ്രേഷ്ഠന്മാരാൽ വിട്ടയയ്ക്കപ്പെട്ട നളമഹാരാജാവ്‌ വിദർഭരാജാവു നല്കിയ സ്ഥാനത്തിരുന്നു. മറ്റു രാജാക്കന്മാരും ദേവഗണങ്ങളും മറ്റും വന്നുകൊണ്ടിരുന്നു. അപ്പോൾ രാക്ഷസർ, ദാനവരെ സമീപിച്ചു പറഞ്ഞു. 

സാരം: വലിയ കേമന്മാരായ നിങ്ങൾ ഇങ്ങനെ ഒന്നും അറിയാതെ ഇരിക്കുകയാണോ? ലോകത്തുള്ളവരൊക്കെ ഭാര്യയെയും മറ്റും സമ്പാദിക്കാൻ വല്ലാതെ പരിശ്രമിക്കുകയാണെന്ന്‌ അറിയുന്നില്ലേ? വിദർഭയിലെ കന്യകയ്ക്കു സമമായി മറ്റൊരുവളില്ല പോൽ. അവളുടെ സ്വയംവരം ആയിരിക്കുന്നു. അതു കാരണം ജനങ്ങളെല്ലാം അവിടെ എത്തിച്ചേർന്നിരിക്കുന്നു.

സാരം: ചൂതും ചതുരംഗവും എല്ലാം മതി. രാക്ഷസർ പറഞ്ഞതു ചതിയോ, അതോ സത്യമോ? ഭൂമിയിലുള്ള ഒരു പെണ്ണ്‌ എത്ര സുന്ദരിയാണെങ്കിലും ദേവന്മാർക്ക്‌ ഇങ്ങനെ താല്പര്യം വന്നത്‌ കൗതുകകരം തന്നെ. രാജാക്കന്മാരെ വധിക്കണം. ദേവന്മാരെ ചതിക്കണം. സർപ്പങ്ങളെ ഓടിക്കണം. ദമയന്തിയെ നമുക്കു ഹരിക്കണം. ശക്തിയില്ലാത്തവർ ഇതൊക്കെ കണ്ടു കൊതിക്കട്ടെ. നമുക്ക്‌ അങ്ങോട്ടു നടക്കാം. മടിച്ചിരുന്നാൽ കനക്കേടു വരും.