എന്തുചൊന്നു കിഴവാധമ കുമതേ!

ഹന്ത നിന്മദമടക്കുവനധുനാ
 

കിന്തു പിതാവുരചെയ്ത വരത്തി-

നന്തരമാശു വരുത്തുവനിഹ ഞാൻ
 

തൃണസമനാകിയ നിന്നുടെ ഹുംകൃതി

രണഭുവി തീർത്തൊരു പതമാക്കാതെ
 

ഗുണനിധി ഞാനുമടങ്ങുവനല്ലാ

ക്ഷണതരമെന്നൊടു വരിക ദുരാത്മൻ!

വ്യാജമല്ല സുമതേ! ഈശനുമെന്നോടാജിചെയ്കിലധുനാ

ആജവം തന്നെ പരാജിതനായിടും
 

രാജവംശോത്ഭവരാജൻ! ധരിച്ചാലും

ആജമീഡപതേ! കേൾ ഭോ സത്രഭോജിരാജനിഭാ! (=ഇന്ദ്രതുല്യാ)
 

വൈരികളെ സമരേ ആശ്രമമിന്നും സൂരസൂനുസദനേ

പാരാതയയ്ക്കുവാൻ വീരനാകുന്ന ഞാൻ

സാരമില്ലൊന്നിനും മാരാരിവിക്രമ!

വൃദ്ധതമനായിമരുവുന്നിവനുടയ ശുദ്ധതയതെന്തു പറവൂ!

അദ്ധ്യാപകന്റെ മമ സിദ്ധാന്തമെന്നിയേ
 

അദ്ധാ ഹരീഹിതം സാദ്ധ്യമാകില്ലിനി

വേളിയതിനായിനി വയം പോക ബാഹു

മേളമൊടു മിത്രസഹിതം

ധാത്രീനായക, ഭവാന്റെ വാർത്തയിന്നു പാർത്തുകാൺകി-

ലെത്രയും വിചിത്രമെന്നിതത്ര ചൊല്ലിടാം
 

ചക്രപാണി ബന്ധുവായ് ഭവിക്കിലായതിന്നു തർക്ക-

മുൾക്കുരുന്നിലൽപ്പവും നിനയ്ക്ക യോഗ്യമോ?

ശത്രുജനപക്ഷപാതി നീയുമിഹ

ശത്രുതാനെന്നു നിയതം
 

നിസ്ത്രപ! ദ്വിജഹതക! ശസ്ത്രമുപേക്ഷിച്ചു

കുത്രാപി പിതൃസവനഭുക്തിയ്ക്കു പോകെടൊ

 

കിം കിമുരചെയ്തു കൃപ! നീ നിന്നുടയ

ഹുംകൃതികൾ തീർപ്പനധുനാ

 

നിന്നുടയ മന്നിലവരേ വാഴിപ്പ-

തിന്നുചിതമല്ല നിയതം
 

നിന്ദ്യനാം ഫൽഗുനൻ മുന്നിൽ മമ വന്നാകിൽ

കൊന്നു വരുവൻ അതിനു സന്ദേഹമില്ല മേ

 

നൃപതികുലവന്ദ്യചരണ! കുരുവീര!

നിശമയ മദീയവചനം

പ്രാണസഖ ! നിന്നുടയ പ്രാണസഖിയോടുചേർ-

ന്നാകര്‍ണ്ണനം ചെയ്ക കര്‍ണ്ണശപഥം 
 

സാക്ഷിയാക്കീടുന്നു മമ താതനെ ജഗല്‍ -

സാക്ഷിയാമാദിത്യഭഗവാനെ
 

ജനനിയെ ഭവാനായ് പരിത്യജിക്കുന്നു ഞാ-

നനുജരാമൈവരെയുമിതു സത്യം !
 

അര്‍ജ്ജുനനുമൊന്നിച്ചു വസുധയില്‍ വാഴുകി-

ല്ലിജ്ജനമിനിമേലിലിതു സത്യം !
 

വീര്യ സ്വര്‍ഗ്ഗത്തില്‍ നിന്മുന്നില്‍ ഞാനെത്തിടും

ദുര്യോധനാ ! സത്യമിതു സത്യമിതു സത്യം !
 

ഇതു കര്‍ണ്ണശപഥം, ഇതു കര്‍ണ്ണശപഥം, ഇതു കര്‍ണ്ണശപഥം.

 

ഹര ഹര ! ശിവ ശിവ ! പിരിയാനോ ദുരിയോധനാ ! നിന്‍ നിര്‍ദ്ദേശം ?

കര്‍ണ്ണന്‍ നന്ദിയെഴാത്തവനോ ? നിര്‍ണ്ണയമതുതാനിന്നര്‍ത്ഥം
 

ഇക്ഷണമിതിനിഹ ശിക്ഷതരേണം പക്ഷേ സ്നേഹം തടയുന്നൂ

പെരിയൊരു പാപത്തിന്‍ ഫലദുരിതം ഹന്ത ഭുജിപ്പൂ ഞാന്‍

മരണം ശരണം , ഛേദിപ്പന്‍ കരവാളാലെന്‍ ഗളനാളം !

 

ശരണാഗതരെ പരിത്യജിക്കില്ലഹമതു വിദിതം

തരുവേനൊരു വാക്കതും ഗ്രഹിച്ചിനി ഗമിച്ചീടേണം
 

നിര്‍ജ്ജരാധിപ നന്ദനനാകിയൊ-

രര്‍ജ്ജുനാഖ്യനെയൊഴിച്ചു മാമക
 

കനിഷ്ഠസോദര ചതുഷ്ഠയത്തെ

ഹനിച്ചിടാ ഞാന്‍ പ്രതിജ്ഞ ചെയ്‌വൂ 

അരുളേണ്ടിനിയും മഹാജനങ്ങടെ മനമിളകീടിലും

അചലാധിപനാം ഹിമാലയം ബത ചലിക്കുമെങ്കിലും
 

നഭസ്സിടിഞ്ഞിഹ പതിക്കുമെങ്കിലും

സമുദ്രമുടനടി വരണ്ടുപോകിലും
 

സഖനെ വിട്ടൊരു വിധത്തിലും

അകലുകില്ലഹമൊരിക്കലും