പാപമകറ്റുന്ന കാളിന്ദിയില്‍ മുങ്ങി, താമരയിലയില്‍ ശോഭിക്കുന്ന ശംഖ് കൈക്കലാക്കിയപ്പോള്‍ അതൊരു കന്യകാരത്നമായി. ശ്രീപരമേശ്വരന്റെ പത്നിയാകാന്‍ പോകുന്നവള്‍ ഭാഗ്യംകൊണ്ട് തനിക്ക് പുത്രിയായി ലഭിച്ചു എന്നുകരുതി ശിശുവിനെ മടിയില്‍ ചേര്‍ത്ത് പത്നിയോട് ദക്ഷന്‍ ഇപ്രകാരം പറഞ്ഞു.

അനേകജന്മങ്ങളെക്കൊണ്ടു നേടിയ നമ്മുടെ പുണ്യഫലം കന്യാരൂപത്തില്‍ നീ കണ്ടാലും. സ്ത്രീകളില്‍ ശ്രേഷ്ഠയായവളേ, ധന്യേ, നിനക്കു മനസ്സില്‍ അനുകമ്പയില്ലേ,? എന്താണ്  മുലകൊടുക്കാത്തത്? ഈശ്വരന്‍ തന്ന നിധിയായ ഈ പുത്രി, വിവിധ ആഗ്രഹങ്ങള്‍ സാധിച്ചു തരുന്ന നന്ദിനിയാണ്. ഈശ്വരേച്ഛ ഇനി നമുക്കനുകൂലമാണ്. ഈ സുന്ദരി സകലലോകത്തേയും ആനന്ദിപ്പിക്കുന്നവളാണ്.