അരുതരുതേ ഖേദം
ഇതി ബഹു ചിന്താ താന്താം
വിലപന്തീം താം സമേത്യ ശിവ കാന്താം
വാണീ ഗീര്‍വ്വാണിഭിസ്സഹ
മൃദുവചനേന സാന്ത്വയാമാസ
പല്ലവി
അരുതരുതേ ഖേദം ബാലേ അംബുജാക്ഷീ ദാക്ഷായാണീ
അനുപല്ലവി
പരിണയനശേഷമേവം പരിതപിക്ക യോഗ്യമല്ല
ചരണം 1
ഇന്ദുചൂഡന്‍ നിന്നരികില്‍ ഇന്നുനാളെ വരുമല്ലോ
സുന്ദരീരത്നമേ പാഴില്‍ ശോകമെന്തേ തേടീടുന്നു.
ചരണം 2
മാനസാര്‍ത്തി കൊണ്ടു നിന്റെ മേനി കൂടെ വാടുന്നയ്യോ
സ്നാനപാനാദികള്‍ ചെയ്തു സാനന്ദം നീ വാഴ്ക ധന്യേ
ഇങ്ങിനെ വിവിധ ചിന്തയാല്‍ തളര്‍ന്ന് വിലപിക്കുന്ന ശിവകാന്തയായ സതിയെ, സരസ്വതി ദേവസ്ത്രീകളോടുകൂടെവന്ന് മൃദുവചനങ്ങള്‍ കൊണ്ട് ആശ്വസിപ്പിച്ചു.
അല്ലയോ ബാലെ ദക്ഷായണീ ഖേദമരുത്. വിവാഹം കഴിഞ്ഞ ഉടന്‍ ഇങ്ങിനെ കരയുന്നത് യോഗ്യമല്ല. ഇന്ദുചൂഡന്‍ ഇന്നോ നാളെയോ നിന്റെ അരികില്‍ വരും. നീ ദു:ഖിക്കേണ്ട. അയ്യോ, മനസ്താപം കൊണ്ട് നിന്റെ ശരീരം വാടുന്നു. സ്നാനപാനാദികള്‍ മുതലായ നിത്യകര്‍മ്മങ്ങള്‍ ചെയ്തു സന്തോഷത്തോടെ ഇരിക്കൂ.