ശിവന്‍ ഇങ്ങനെ പറയുകയും നാരദന്‍ നമസ്കരിച്ചു പോവുകയും ചെയ്ത ഉടനെ,  അച്ഛന്‍റെ ഗംഭീരമായ യാഗമഹോത്സവം കാണുവാന്‍ ഏറ്റവും കൌതുകം പൂണ്ട്, എല്ലാ പതിവ്രതമാരുടേയും മുടിമാലയായ ആ സതീദേവി തന്‍റെ ഭര്‍ത്താവിനോട് കാല്‍ക്കല്‍ നമസ്കരിച്ച് പറഞ്ഞു.

ലോകത്തിന്‍റെ അധിപനായ കരുണാമയനായ ഭര്‍ത്താവേ എന്‍റെ വാക്ക് കേട്ടാലും. എന്‍റെ മനസ്സില്‍ ഒരു ആഗ്രഹം വളരുന്നുണ്ട്‌. അതിന്‌ അനുവാദം തരണം. ഇന്ന് എന്‍റെ അച്ഛന്‍ ചെയ്യുന്ന യാഗോത്സവങ്ങള്‍ പോയികണ്ട് വരാന്‍ എന്നെ അവിടുന്ന് അനുവദിക്കണം. എന്‍റെ സഹോദരിമാര്‍ എല്ലാവരും അവിടെ വരും. അവരേയും കാണാമല്ലൊ.അവിടെ ഞാന്‍ ചെന്നു എങ്കില്‍ അച്ഛന്‍റെ വിദ്വേഷം മുഴുവനും തീരും. അത് മാത്രമല്ല എല്ലാവര്‍ക്കും സന്തോഷവും ആവും. യാഗവും വേണ്ടത് പോലെ ഫലവത്തായി വന്നിടും.