ദക്ഷന്‍ , ശിവന്‍റെ അനുഗ്രഹത്താല്‍ , ആട്ടിന്‍തല കഴുത്തില്‍ ചേര്‍ത്ത്  ജീവനുള്ളവനായി മാറി യാഗം വിധിപോലെ പൂര്‍ത്തിയാക്കി. പിന്നീട് ദണ്ഡ് മുതലായവ കയ്യിലേന്തിയവനും ചന്ദ്രനാല്‍ ശോഭിക്കപ്പെട്ട ശിരസ്സോടുകൂടിയവനുമായ ശിവനെ പ്രണമിച്ച്‌ സന്തോഷത്തോടെ ഇങ്ങിനെ സ്തുതിച്ചു.

അല്ലയോ ചന്ദ്രചൂഡാ,ജഗദീശ്വരാ എന്നെന്നും ജയിച്ചാലും. അങ്ങക്ക്‌ നമസ്കാരം. എന്‍റെ അപരാധം എല്ലാവിധത്തിലും പൊറുക്കേണമേ. നിങ്കല്‍ ഭക്തി ഒട്ടും കുറവില്ലാതെ എനിക്ക് തരേണമേ. എന്നെ അങ്ങയുടെ ഭൃത്യനായി കരുതിയാലും. ചിന്മയാകൃതിയായ അല്ലയോ പരമാത്മരൂപാ നിന്‍റെ മഹത്വം അറിയാന്‍ ഞാന്‍ ആളാണോ? എന്റെ മകള്‍ സതി നിന്‍റെ ശക്തിയാണെന്ന് അറിയാതെ ധിക്കരിച്ചതിന് അനുഗ്രഹം നല്‍കിയത് അങ്ങയുടെ കാരുണ്യമാണ്. ഇനിമുതല്‍ എന്‍റെ കൈകള്‍ക്ക് പ്രവൃത്തി നിന്നെ കൂവളത്തിലകളാല്‍ അര്‍ച്ചിക്കലാകട്ടെ. നിന്റെ നാമഗുണഗണസങ്കീര്‍ത്തനമാകട്ടെ എന്‍റെ വാക്കുകളുടെ പ്രവൃത്തി. അല്ലയോ ദുരിതഹര എന്റെ ചെവികള്‍ അങ്ങയുടെ ചരിതാമൃതം കുടിക്കട്ടെ. വരമേകുന്നവനേ, ഗിരീശ്വരാ അങ്ങ് എന്റെ ഹൃദയത്തില്‍ സന്തോഷത്തോടെ വിളയാടിയാലും. പാമ്പുകള്‍ ആഭരണമായിട്ടുള്ളവനേ, നല്ല വാക്കുകള്‍ പറയുന്നവനേ, സജ്ജനങ്ങളെ സന്തോഷിപ്പിക്കുന്നവനേ,നരകമോചനാ,ചന്ദ്രനാല്‍ശോഭിക്കുന്നവനേ,നെറ്റിയില്‍കണ്ണോടുകൂടിയവനേ,ആപത്തുകള്‍ ഇല്ലാതാക്കുന്നവനേ, വിഷ്ണു,ബ്രഹ്മാവ്‌ എന്നിവരാല്‍ അര്‍ച്ചിക്കപ്പെടുന്നവനേ, മൂന്നുലോകങ്ങളും നിയന്ത്രിക്കുന്നവനേ, പര്‍വ്വതം ഇരിപ്പിടമായവനേ, കാളവാഹനമായിട്ടുള്ളവനേ എന്നെരക്ഷിച്ചാലും.