സഭാവാസികളുടെ കണ്ണുകളാൽ പാനം ചെയ്യപ്പെട്ട സൗന്ദര്യാമൃതത്തോടുകൂടിയവളും പാത്രമേന്തിയ കൈകളോടുകൂടിയവളും  അരികെയെത്തിയവളുമായ മാലിനിയോട് അതിരറ്റ സന്തോഷത്തിന് പാത്രമായ കീചകൻ ബഹുമാനപുരസ്സരം ഇങ്ങിനെ പറഞ്ഞു.

മാന്മിഴികളായ സുന്ദരിമാർ തലയിൽ ചൂടുന്ന രത്നമേ, അല്ലയോ മാലിനീ, നീ എന്റെയടുത്ത് വന്നാലും. നടന്നുതളർന്ന നിന്റെ കാൽത്താമരകളെ തലോടുവാൻ ആഗ്രഹിയ്ക്കുന്നവനാണ് ഞാൻ. മദിച്ച കളഹംസത്തെപ്പോലെ നടക്കുന്നവളേ, ശശിമുഖീ, ധന്യേ നീ എന്റെ ഗൃഹത്തിൽ തനിച്ച് വന്നതിനാൽ ഞാൻ ഭാഗ്യവാനായി. എന്റെ ഗൃഹം ശ്രേഷ്ഠമായി, എന്റെ ജന്മം സഫലമായി. അല്ലയോ സുന്ദരീ, ഈ മഞ്ചത്തിലിരുന്ന് നമുക്ക് രമിയ്ക്കാം.