ചാപം മുറിഞ്ഞു രണഭൂമിയിൽ വീണശേഷം

ഭൂപൻ തദാ കലശസംഭവദത്തമാകും

ചാപം കുലച്ചു കൃതവാനതിവീരവാദം

കോപാരുണാക്ഷനുടനേ രഘുവീരനൂചേ

കങ്കങ്ങൾ തന്നെ ചവുട്ടിയുരുട്ടീടാം മോദമോടു ഭുജിച്ചീടും

തുംഗബാണമയയ്ക്കുന്നേനഹമങ്ങു നിൻതല കൊയ്തിടും

വീണിടും ഭുവി നീ തന്നെ എന്റെ ശസ്ത്രത്താൽ കൃത്തകണ്ഠനായ്

കാണലാം പിന്നെ കങ്കങ്ങൾ പദത്താൽ

ചവുട്ടിമറിപ്പതും കാണലാമതു കാണലാം

കണ്ടിടാമതു ഭൂമിയിൽ ത്രിശിരസ്സു ചത്തു മറിഞ്ഞപോൽ

ഇണ്ടലോടു നികൃത്തകണ്ഠനായ് വീണിടും ഭുവി നീയെടാ

പോരിലെന്നോടെതിർത്തുനിന്നു ജയിക്കിലോ നീ മഹാബലൻ

ആരുമീവണ്ണം ചൊല്ലിടാം എന്നെ യുദ്ധത്തിൽ കണ്ടിടാം ദൃഢം

വാണിരിപ്പതിനൊട്ടുമേ തവ മോഹമില്ലതിനാലല്ലൊ

നാണമെന്നിയെൻമുന്നമേ വന്നു പോരിനായി വിളിച്ചുനീ

കാണലാമെന്റെ പാണിയാൽ നിന്റെ മൗലിയറ്റു തെറിപ്പതും

വാണിരിപ്പതിനായി നിന്നെയയയ്ക്കയില്ലൊരുനാഴിക

ആഹവത്തിലിന്നെന്നെ ഹനിപ്പതിനായല്ലോയിങ്ങു വന്നു നീ

ആകട്ടെ എങ്കിലതവ്വണ്ണം തന്നെ നേരിനൊത്തതു കാണലാം

ആളല്ലെങ്കിലോ ശൂർപ്പണഖീമുലമൂക്കരിയിച്ചതെന്തിനായ് കേൾ

നീ പിന്നെപ്പതിന്നാലു യാതുധാനരെക്കൊലചെയ്തതും

ബാലനാം ത്രിശിരസ്സിനേയും രണങ്കണേ കൊന്നു പിന്നെയും

ചാലവേയവരെ ഹനിച്ചതിന്നു കൊല്ലുവൻ നിന്നെ ഞാൻ

നിന്നോടിന്നമർ ചെയ്തതിന്നഹമാളല്ലെന്നിതുറപ്പല്ലൊ

പിന്നെയെന്തിനു യുദ്ധം ചെയ്‌വതിനായ് വിളിപ്പതു ചേരുമോ?

മന്നിലിന്നു തരക്ഷുവോടു രണത്തിനേണം പോരുമോ?

നന്നുനന്നേവം ചൊല്ലി യുദ്ധത്തിനെന്നെ നീ വിളിക്കുന്നതും

പെരിക നന്നു നിനയ്ക്കിലോ?