(എങ്ങനെയൊക്കെ ശ്രമിച്ചിട്ടും ഇരട്ടിയക്ഷരം പറഞ്ഞിട്ടും ഭാഗം താളത്തില്‍ ഒതുങ്ങുന്നില്ല. രഥയാത്രയായതിനാല്‍ മുറിയടന്ത താളം മാറ്റുന്നതിനും കഴിയില്ല. ഋതുപര്‍ണ്ണന്‍റെ വരികള്‍ താളത്തിലൊതുങ്ങി. അതിനാല്‍ ഇതും താളത്തിലാകുമെന്ന പ്രതീക്ഷയോടെ ശ്രമം തുടര്‍ന്നു. ചൊല്ലിയാട്ടം നിര്‍ത്തി. ഈ വരികള്‍ക്കുമുകളില്‍ അവിടെയുള്ളവര്‍ ഓരോരുത്തരും അഭിപ്രായം പറഞ്ഞു തുടങ്ങി. പാട്ടറിയാത്ത ഞാനും പാടിനോക്കാതിരുന്നില്ല. അപ്പോഴാണ്‌ ഏഴുമാത്രകളുടെ അഞ്ചുഖണ്ഡങ്ങളാണ്‌ ഓരോ വരിയും എന്ന് രാജാനന്ദന്‍ ചൂണ്ടിക്കാട്ടിയത്. അടുത്ത നിമിഷം ബാബു പാടി.)
എനിക്ക് വളരെ അത്ഭുതം തോന്നുന്നു. എന്റെ ചെറുപ്പത്തിൽ കണ്ടിട്ടുള്ള നളചരിതം മൂന്നാം ദിവസങ്ങൾ കലിയുടെ ക്ഷമാപണത്തോടെയാണ് അവസാനിച്ചു കണ്ടിട്ടുള്ളത്. ബ്രഹ്മശ്രീ. മാങ്കുളം വിഷ്ണുനമ്പൂതിരിയുടെ ബാഹുകൻ അദ്ദേഹത്തിൻറെ ശിഷ്യൻ ശ്രീ. ചെന്നിത്തല രാഘവൻ പിള്ളയുടെ കലിയും ധാരാളം കണ്ടിട്ടുണ്ട്. അതായത് പ്രസ്തുത ബാഹുകൻ, ഋതുപർണ്ണൻ രംഗം കഴിഞ്ഞ്.

" അന്തിയാം മുൻപേ ..." ,  "അതു നല്ല ചിന്തിത നാശനം"  എന്നീ ചരണങ്ങൾ പാടാതെയല്ല ഈ കളികൾ നടത്തിയിട്ടുള്ളത്.
എന്റെ ബ്ലോഗിൽ "കലിയോട്ടം" എന്ന ഒരു പോസ്റ്റ് ഉണ്ട്. അന്ന് മാങ്കുളത്തിന്റെ ബാഹുകന് പാടിയത് ശ്രീ. പത്തിയൂർ കൃഷ്ണപിള്ള ചേട്ടനാണ് ( ശ്രീ. ശങ്കരൻ കുട്ടിയുടെ പിതാവ്).
ഇരട്ടിയക്ഷരവും മുറിയടന്തയെ പറ്റിയൊന്നും എനിക്ക് വിവരമില്ല. എന്നാൽ ശ്രീ. നീലംപേരൂർ കുട്ടപ്പപണിക്കരും ശ്രീ. തിരുവല്ലാ ഗോപിക്കുട്ടൻ നായരും ഈ രംഗങ്ങൾ പാടിയ അനുഭവം ഉണ്ട്.

ഇതെല്ലം വായിക്കുന്ന അനുഭവമുള്ള കലാകാരന്മാർ മൌനികളായിരിക്കുന്നതു കാണുമ്പോൾ വളരെ  ഖേദം ഉണ്ട് .

കഴിഞ്ഞ കുറെ വർഷങ്ങളായി നളചരിതം ആട്ടക്കഥ സമ്പൂർണ്ണമായി അവതരിപ്പിക്കപ്പെടുന്നത് വിരളമാനെങ്കിലും (പരസ്യത്തിൽ സമ്പൂർണ്ണം എന്നാണെങ്കിലും അരങ്ങിൽ ഉണ്ടാവാറില്ല), ഈ ആട്ടക്കഥയുടെ ആദ്യരംഗം മുതൽ അവസാനരംഗം വരെ തെക്കൻ ചിട്ടയിൽ ചിട്ടപ്പെടുത്തി അരങ്ങിൽ വളരെക്കാലം അവതരിപ്പിക്കപ്പെട്ടിട്ടുണ്ട് എന്നാണു എന്റെ അറിവ്. വളരെ കഷ്ട്ടപ്പെട്ടു ചിട്ടപ്പെടുത്തിയെടുത്തു എന്ന് ലേഖനത്തിൽ പറയുന്ന 'അന്തിയാം മുൻപേ കുണ്ടിനം --- 'എന്ന ബാഹുക പദം ഇറവങ്കര ഉണ്ണിത്താൻ മുതൽ പത്തിയൂർ കൃഷ്ണപിള്ള, തകഴി കുട്ടൻ പിള്ള, തിരുവല്ല ഗോപിക്കുട്ടൻ നായർ വരെയുള്ള ഗായകർ അനവധി അരങ്ങുകളിൽ  പാടിക്കഴിഞ്ഞതാണ്. ഇങ്ങനെയെങ്കിൽ ഡോക്ടർ. കണ്ണൻ പറഞ്ഞിരിക്കുന്നതിന്റെ അർഥം എന്താണ്? കല്ലുവഴിചിട്ടയിൽ ആദ്യമായി ചിട്ടപ്പെടുത്തി എന്നാണോ? പക്ഷെ ഈ പദങ്ങൾ കലാമണ്ഡലം എംബ്രാന്തിരിയും ഹൈദരാലിയും പാടിയിരുന്നല്ലോ? ശ്രീമാന്മാർ ഗുരു കുഞ്ചുക്കുറുപ്പ്, തോട്ടം ശങ്കരൻ നമ്പൂതിരി, കലാമണ്ഡലം കൃഷ്ണൻ  നായർ, മാങ്കുളം വിഷ്ണു നമ്പൂതിരി എന്നീ മഹാരഥന്മാർ നൂറു കണക്കിന്  അരങ്ങുകളിൽ ആടി അവതരിപ്പിച്ചിട്ടുള്ള ഈ രംഗങ്ങൾക്ക്‌ എന്ത് വ്യത്യാസമാണ് ഈ ശിൽപ്പശാലയിൽ വരുത്തിയിട്ടുള്ളത് എന്ന് അറിയാൻ ആഗ്രഹം ഉണ്ട്. കൃഷ്ണൻ നായർ ആശാന്റെ ശിഷ്യനായ മാർഗ്ഗി വിജയകുമാർ ഈ ശിൽപ്പശാലയിലെ സജീവ സാന്നിധ്യം ആയിരുന്ന നിലക്ക് അദ്ദേഹത്തിൻറെ ഈ വിഷയത്തിലുള്ള അഭിപ്രായങ്ങൾക്ക് വളരെ പ്രസക്തിയുണ്ട്.  അതുപോലെ ആശാന്റെ മറ്റൊരു ശിഷ്യനായ ശ്രീ. തോന്നക്കൽ പീതാംബരനും മാങ്കുളം തിരുമേനിയുടെ ശിഷ്യരും ഈ നളചരിത പരിഷ്ക്കരണങ്ങളെ  എങ്ങിനെ നോക്കിക്കാണുന്നു എന്നറിയാൻ ആഗ്രഹം ഉണ്ട്. 
 

നല്ല അനുഭവക്കുറിപ്പ്. ഇത്തരത്തിലുള്ള ഒരു കലാന്വേഷണസംഘം രൂപികരിച്ചതിനും, സമ്പൂർണ്ണ നളചരിതം കളരി പ്രാവർത്തികമാക്കാൻ ശ്രമിക്കുന്നതിനും തിരനോട്ടത്തിന് അകമഴിഞ്ഞ അഭിനന്ദനങ്ങൾ. ആ 4 ദിവസങ്ങൾ ഏറെ വിജ്ഞാനപ്രദങ്ങളായിരുന്നിരിക്കണം. ഇത്തരത്തിലുള്ള വിദ്വൽസദസ്സുകൾ സംഘടിപ്പിക്കാൻ തിരനോട്ടത്തിന് ഇനിയും സാധിക്കട്ടെ !

കണ്ണേട്ടന്റെ കുറിപ്പിൽ ഒരിടത്തും നളചരിതസംബന്ധമായ പുതിയ കണ്ടുപിടിത്തങ്ങൾ ഈ കളരിയിൽ ഉണ്ടായി എന്ന് അവകാശപ്പെടുന്നതായി എനിക്ക് തോന്നിയില്ല. അതു കൊണ്ട് പണ്ടത്തെ ആചാര്യന്മാരുടെ സംഭാവനകൾ എപ്പോഴും സ്മരിക്കുമ്പോൾ തന്നെ അതിലുമെത്രയോ കൂടുതൽ ഇവിടെ പ്രസക്തമായി എനിക്ക്  തോന്നുന്നത്, ഇത്തരത്തിലുള്ള ശിൽപശാലകൾ ഇപ്പോഴും ഇവിടെ ഉണ്ടാകുന്നു, തിരനോട്ടം നളചരിതസംബന്ധമായ ഒരു വിപുലമായ പ്രൊജക്റ്റ് വളരെയധികം ഗൗരവത്തോടെ, പ്രാവർത്തികമാക്കാൻ ആത്മാർത്ഥയോടെ പരിശ്രമിക്കുന്നു എന്ന കാര്യം തന്നെയാണ്. ആ വസ്തുത നമ്മെ അത്യധികം ആഹ്ലാദിപ്പിക്കേണ്ടതല്ലേ ?

തികഞ്ഞ പ്രായോഗികജ്ഞാനവും ധൈഷണികജ്ഞാനവുമുള്ളൊരാൾക്കു സമീപിക്കാൻ കഴിയുന്ന വിധത്തിലാണ് കണ്ണേട്ടൻ നളചരിതത്തെ സമീപിക്കുന്നത്. അതുകൊണ്ടുതന്നെ ഓരോ സൂക്ഷ്മാംശങ്ങളിലുമുള്ള നിരീക്ഷണങ്ങൾ വ്യക്തമാ വാൻഅതാത് സങ്കേതങ്ങളിൽ അനുഭവജ്ഞാനവും അത്യാവശ്യമാണ്.
എന്തായാലും തിരനോട്ടത്ത് അകമഴിഞ്ഞ് അഭിനന്ദിക്കുന്നു.മിത്തരമൊരു വിപുലപ്രവർത്തനത്തിനു പ്ലാറ്റ്‌ഫോം ഒരുക്കുക എന്ന ശ്രമകരവും സ്വപ്നസമാനവുമായ ദൗത്യം നിറവേറ്റിയത് വലിയൊരു കാര്യമാണ്. ഒറ്റസങ്കടം മാത്രം, വ്യക്തിപരമായ പ്രശ്നങ്ങൾ കാരണം എനിക്കു പങ്കെടുക്കാനായില്ല. തീർച്ചയായും ഞാനുമുണ്ടാവണമെന്നു മോഹിച്ചൊരു ക്യാമ്പായിരുന്നു ഇത്. എന്തു ചെയ്യാം, കാക്കയ്ക്കു വായ്പ്പുണ്ണ് കൃത്യസമയത്താവുമല്ലോ !

കണ്ണേട്ടൻ പറഞ്ഞതുപോലെ, അപൂർവ്വഭാഗങ്ങൾ വായിക്കുമ്പോഴൊക്കെ തോന്നാറുള്ളതാണ് കഥകളിയിൽ ഈ ഭാഗങ്ങളെല്ലാം എങ്ങനെ ഒതുക്കിപ്പാടാനാവും എന്ന സംശയം. അവയെ സുവ്യക്തമായി നേരിടാൻ വാസുവാശാനെപ്പോലൊരു ആചാര്യനേ കഴിയൂ.
തികഞ്ഞ സന്തോഷം, ഈ സംരംഭത്തിലും, ഈ കുറിപ്പിലും. നളചരിതോൽസവത്തിൽ ഭാഗഭാക്കാവുന്ന എല്ലാ കലാകാരന്മാർക്കും ചങ്ങാതിമാർക്കും ആശംസകൾ.

ശ്രീ.കണ്ണൻ, ശ്രീചിത്രൻ, നിഖിൽ: വിദേശരാജ്യത്തു ഒരിടത്ത് സമ്പൂർണ്ണ നളചരിതം ഭംഗിയായി അവതരിപ്പിക്കാൻ വേണ്ടി അതിനു യോഗ്യതയുള്ളവർ കുറച്ചു പേർ കൂടി ഒരു നല്ല തയ്യാറെടുപ്പ് എന്ന നിലയിൽ ഒരു ശിപ്പശാല നടത്തി എന്ന് പറഞ്ഞാൽ അതിൽ ആക്ഷേപത്തിന് വകയില്ല, എന്നുതന്നെയല്ല എന്നെപ്പോലെയൊരു കഥകളിപ്രേമിക്ക് അത് സന്തോഷകരമായ ഒരു വാർത്തയും ആണ്. അല്ലായെങ്കിൽ, ഒരു സഹൃദയൻ ഫേസ്ബുക്കിൽ അഭിപ്രായപ്പെട്ടതുപോലെ, വാഴേങ്കടആശാന്റെ വള്ളുവനാടൻ ശൈലിയിലുള്ള ഒരു വേറിട്ട നളചരിതാവിഷ്ക്കരണമാണ് ശിൽപ്പശാലയിൽ ഉദ്ദേശിച്ചതെങ്കിൽ അതിലും എനിക്ക് പരാതിയില്ല, സന്തോഷമേ ഉള്ളൂ. നളചരിതത്തിന്റെ വേറൊരു ദൃശ്യാവിഷ്ക്കരണം ഉണ്ടാകുന്നത് നല്ലതല്ലേ? പക്ഷെ ''വാസുവാശാന്‍റെ നേതൃത്വത്തില്‍ നടന്നചരിത്രസംഭവമായ ഈ രംഗസംവിധാനശില്‍പശാലയില്‍ ------ സമഗ്രവും കഥകളിത്തം നിറഞ്ഞതുമായ ഒരു രംഗസം‍വിധാനം നളചരിതത്തിലെ ഒഴിവാക്കപ്പെട്ട രംഗങ്ങള്‍ക്ക് ഇതിനും മുമ്പ് ഉണ്ടായിട്ടുണ്ടോ എന്നറിയില്ല --- അക്ഷരങ്ങളിലും ചലച്ചിത്രങ്ങളിലും രേഖപ്പെടുത്തുന്ന ഈ നളചരിതരംഗസംവിധാനം അരങ്ങില്‍ വാഴ്ച നേടുമെന്ന് പ്രത്യാശിക്കാം'' എന്നൊക്കെ പറയുമ്പോൾ നളചരിതത്തിന്റെ (കുറഞ്ഞ പക്ഷം അരങ്ങിൽ പതിവില്ലാത്ത രംഗങ്ങല്ക്കെങ്കിലും) അടിസ്ഥാനപരമായ, ദൂരവ്യാപകമായ പല നിർമ്മിതികൾക്കും ഈ ശില്പ്പശാല കൊണ്ട് സാധിച്ചു എന്നാണല്ലോ അർഥം. ഇവിടെ എനിക്ക് ചില അഭിപ്രായ വ്യത്യാസങ്ങൾ ഉണ്ട്. 

നളചരിതം ആട്ടക്കഥയുടെ രംഗഭാഷ്യം ആരൊക്കെയാണ് നിർമ്മിച്ചതെന്ന് നമുക്കെല്ലാം ഇപ്പോൾ അറിയാം, ഞാൻ എന്റെ ലേഖനങ്ങളിലൂടെ പലവട്ടം അത് പറഞ്ഞിട്ടും ഉണ്ട്. ഇങ്ങിനെ ഒരു ശില്പ്പശാല സംഘടിപ്പിക്കുമ്പോൾ ആദ്യം ചെയ്യേണ്ടിയിരുന്നത് ആ പൂർവസൂരികളൊക്കെ എന്താണ് ചെയ്തു വച്ചിരുന്നത് എന്ന് കർക്കശമായി വിലയിരുത്തി അതിൽ എന്തൊക്കെ ആവശ്യം മാറ്റങ്ങൾ വരുത്തേണ്ടതുണ്ടെന്നു വസ്തുനിഷ്ട്ടമായി പരിശോധിക്കയായിരുന്നു.  'അരങ്ങിൽ ഇപ്പോൾ പതിവില്ല' എന്ന് പറഞ്ഞാൽ അതിന്റെ അർഥം 'അരങ്ങിൽ ഉണ്ടായിട്ടില്ല' എന്നല്ലല്ലോ? അരങ്ങത്തു ഇന്ന് പതിവില്ലാത്ത രംഗങ്ങൾ പതിറ്റാണ്ടുകൾ അവതരിപ്പിച്ച കലാകാരന്മാർ ഇന്നും ജീവിച്ചിരിപ്പുണ്ട്. അവരോടു ഒരന്വേഷണം നടത്തേണ്ടിയിരുന്നില്ല? ഒരു ഫോണ്‍ വിളിയിൽ കൂടി തന്നെ വേണ്ട വിവരങ്ങൾ കിട്ടാമായിരുന്നു. അടുത്ത ചോദ്യം, നളചരിതം പോലെ ജനപ്രിയമായ ഒരു കഥകളിക്കു 'ചരിത്രപരമായ ഘടനാവ്യത്യാസം' ഉണ്ടാക്കേണ്ടത് ആരാനെന്നതാണ്. നളചരിത പരിഷ്ക്കരണം എന്ന വളരെ ഗൌരവമേറിയ ഒരു വിഷയം ആണ് ഉദ്ദേശമെങ്കിൽ ഈ വിഷയത്തിൽ പ്രാഗത്ഭ്യം തെളിയിച്ചിട്ടുള്ള കലാകാരന്മാരും സാഹിത്യപ്രമുഖരും നല്ല പ്രേക്ഷകരും മറ്റ് അണിയറ ശിൽപ്പികളും കേരളകലാമണ്ഡലം പോലെ  ഉത്തരവാദിത്തപ്പെട്ട ഒരു സ്ഥാപനത്തിന്റെ മേൽനോട്ടത്തിൽ  ദിവസങ്ങൾ നീണ്ടു നിൽക്കുന്ന സെമിനാറുകൾ നടത്തണം. ആ സെമിനാറുകളിൽ ഉരുത്തിരിഞ്ഞു വരുന്ന ചിന്തകളുടെ അടിസ്ഥാനത്തിലായിരിക്കണം ഇതുപോലൊരു കാര്യം ചെയ്യേണ്ടത്. ഈ ചർച്ചകളിൽ നളചരിതം കഥകളിയുടെ ഈറ്റില്ലമായ തെക്ക് നിന്നും പ്രൊഫ. പന്മന രാമചന്ദ്രൻ നായർ, പി. നാരായണക്കുറുപ്പ്, ഇഞ്ചക്കാട്ടു  രാമചന്ദ്രൻ പിള്ള, തിരുവല്ല ഗോപിക്കുട്ടൻ നായർ എന്നിവരും വടക്കു നിന്ന് ഗോപിയാശാൻ, വാസുപ്പിശാരടിയാശാൻ തുടങ്ങിയ നടന്മാരും രാജാനന്ദ് തുടങ്ങിയ കഥകളിപണ്ഡിതന്മാരും പങ്കെടുക്കട്ടെ. നളചരിതം ആട്ടക്കഥ കഥകളിക്കു കൊള്ളില്ല എന്ന് പറയുന്ന പണ്ഡിതന്മാർക്ക്  ഇങ്ങിനെ ഒരു ചർച്ചയിൽ ഒരു പങ്കാളിത്തവും ഉണ്ടാവാനും പാടില്ല. ഇങ്ങിനെ കൂട്ടായ ചർച്ചകളിൽ കൂടി  നളചരിത പരിഷ്ക്കരണങ്ങൾ നടപ്പാക്കിയാൽ  മാത്രമേ അതിനു കേരളം ഒട്ടുക്കും ജനസമ്മിതി ഉണ്ടാവൂ.  അല്ലാതെ ഒരാൾ കുറച്ചു പണവുമായി വന്നു്, അയാൾക്കിഷ്ട്ടപ്പെട്ട ഒരു കഥകളി കലാകാരനെ വിളിച്ച്‌, അദ്ദേഹം അദ്ദേഹത്തിനിഷ്ട്ടപ്പെട്ട ചില കലാകാരന്മാരെയും സാഹിത്യപണ്ഡിതന്മാരെയും വിളിച്ചു കൂട്ടി ചെയ്യേണ്ട ഒരു കൊച്ചുകാര്യമല്ല ഇത്. അങ്ങിനെ ചെയ്യാൻ തുടങ്ങിയാൽ നാട് മുഴുവൻ നളചരിത പരിഷ്ക്കരണം നടക്കും. വിഭാഗീയത വളരും. ഈ കഥകളിയുടെ നാശമായിരിക്കും ഫലം. അതുണ്ടാകരുത്. ഉദ്ദേശം നല്ലതും ഫലം മറിച്ചും ആകരുത്. അതാണ്‌ ഞാൻ ഉദ്ദേശിച്ചത്, അല്ലാതെ ശിപ്പശാലയുടെ സദുദ്ദെഷത്തെയൊ അതിൽ പങ്കെടുത്തവരുടെ ഈ വിഷയത്തിലുള്ള കഴിവുകളെയോ ഞാൻ ചോദ്യം ചെയ്യുന്നില്ല എന്ന് മാത്രമല്ല, ബഹുമാനപുരസ്സരം നോക്കിക്കാണുകയും ആണ് ചെയ്യന്നത്. 

വാൽക്കഷണം: ഈ ശിൽപ്പശാലയിൽ ഒരു നളചരിത ഗാനഘടന കണ്ടു പിടിച്ചു എന്ന വിവരം പറഞ്ഞ്‌, ആശാൻ ഈ പദം പാടിയിട്ടുണ്ടോ എന്ന്  ഞാൻ  തിരുവല്ല ഗോപിക്കുട്ടൻ നായരോട്  ചോദിച്ചു (നമ്മുടെ ഇഷ്ട്ടാനിഷ്ട്ടങ്ങൾക്കപ്പുരം, നളചരിതം  കഥകളിയുടെ പഴയ സുവർണ്ണ കാലഘട്ടങ്ങളിൽ എല്ലാ ഗുരുനാഥന്മാർക്കും  വേണ്ടി പാടിയിട്ടുള്ള ഗായകനാണ് ഇദ്ദേഹം എന്ന് ഓർക്കേണ്ടതുണ്ട് ). അദ്ദേഹം  കുറെ നേരം ഒന്നും മിണ്ടിയില്ല, കുറെക്കഴിഞ്ഞപ്പോൾ ഒരു നെടുവീർപ്പോടെ പറഞ്ഞു 'കഷ്ട്ടം, എനിക്കൊന്നും പറയാനില്ല, എല്ലാം മാറി മറിയുന്ന ഈ കാലത്ത് ജീവിക്കേണ്ടി വരുന്നതാണ് മഹാരഥന്മാരുടെ പിറകിൽ നിന്നും പാടിയ എൻറെ ദുർവിധി'.  ഈ ദുഃഖം കഥകളിക്കു നല്ലതാണോ?

സര്‍വ്വ ശ്രീ മോഹന്‍ദാസ്‌ സാര്‍ പറഞ്ഞതാണ്‌ എന്റെയും അഭിപ്രായം. ഒരു വിദേശ രാജ്യത്ത് അവതരിപ്പിക്കാനായി രംഗ പരിചയമില്ലാത്ത ചിലര്‍ക്കായി വാസുപ്പിഷാരടി ആസാനെപ്പോലെ അനേകം പൂര്‍വ്വ സൂരികലുമായി അരങ്ങു പങ്കിട്ട ഒരു ആചാര്യന്റെ നേതൃത്വത്തില്‍ ശില്പ സാല സംഘടിപ്പിച്ചു എന്ന് പറഞ്ഞിരുന്നെങ്കില്‍ അതില്‍ പരാതിയുന്റാകുമായിരുന്നില്ല. അദ്ദേഹം ഇതിനെല്ലാം മുന്പ് ഏതെങ്കിലും ഒരു പാഠം ഉണ്ടായിട്ടുണ്ടോ എന്ന് തനിക്കറിയില്ല എന്ന് പ്രത്യേകം പറഞ്ഞിരിക്കുന്നതിനാല്‍ അങ്ങിനെ ഒരു അന്വേഷണം നടത്തിയിരുന്നില്ല എന്ന് വ്യക്തമാണ്. വലിയ ഡോക്യുമെന്റേഷനോടുകൂടി നടത്തുന്ന പരിപാടിയായതിനാലും പഴയ അരങ്ങുകള്‍ക്ക് അതില്ലാത്തതിനാലും ഇതാണ് സത്യം എന്ന് വരും തലമുറ വിശ്വസിക്കാന്‍ സാധ്യത്യുല്ലതിനാലും, ഇതിന്റെ സംഘാടകര്‍ സമഗ്രമായ ഒരു അന്വേഷണം നടത്തെന്ടതയിരുന്നു. മോഹന്‍ ദാസ് സാര്‍ പറഞ്ഞതുപോലെ കുറഞ്ഞ പക്ഷം ഫോണ്‍ എടുത്ത് ഒന്ന് വിളിച്ചിരുന്നെങ്കില്‍ നിസ്സാരമായി താളത്തില്‍ ഒതുങ്ങുമായിരുന്ന കാര്യത്തെ ആഗോള പ്രശ്നമായി അവതരിപ്പിച്ചു ഈ അവസ്ഥയില്‍ ആക്കാതെ കഴിക്കാമായിരുന്നു. ഡോക്ടറേറ്റ്‌ ഡിഗ്രി കരസ്ഥമാക്കിയ ശ്രീ കണ്ണന് literature review -വിനു ഗവേഷനത്തിലുള്ള സ്ഥാനം ഞാന്‍ പ്രത്യേകം പറഞ്ഞു തരെന്ടതില്ലല്ലോ.
ഈ അടുത്ത കാലത്ത് രണ്ടും മൂന്നും ദിവസങ്ങളുടെ ഉത്തര ഭാഗങ്ങള്‍ കാണാന്‍ സാധിച്ചിരുന്നു.
 

കഥകളിയെ ഗൌരവപരമായി വീക്ഷിക്കുകയും കഥകളി വിഷയങ്ങളിൽ സ്വതന്ത്ര നിലപാടുകൾ പ്രോത്സാഹിപ്പിക്കപ്പെടുകയും ചെയ്യുന്ന ഒരു വെബ്സൈറ്റ്  ആണ്  കഥകളി.ഇൻഫോ. എന്നുള്ള അടിസ്ഥാന വിശ്വാസത്തിലാണ് ഞാൻ ഇവിടെ ലേഖനങ്ങൾ എഴുതുകയും പ്രതികരണങ്ങൾ രേഖപ്പെടുത്തുകയും ചെയ്യുന്നത്. എൻറെ ആ വിശ്വാസത്തിനു എതിരായി ഒന്നും തന്നെ ഇതുവരെ സംഭവിച്ചു ഞാൻ കണ്ടിട്ടുമില്ല. പക്ഷെ ഇപ്പോൾ വെബ്‌സൈറ്റിൽ പേര് രജിസ്റ്റർ ചെയ്യാതെ ഊരും പേരും ഇല്ലാത്ത ആർക്കും വായിൽ വരുന്നതെന്തും വിളിച്ചു പറയാനുള്ള ഒരിടം ആയി ഇവിടം മാറുന്നുണ്ട്. ഫേസ് ബുക്ക്‌ ത്രെഡ്കളിലുണ്ടാകുന്ന ഈ അപചയം ഈ നല്ല വെബ്സൈറ്റിനെയും ബാധിക്കാതിരിക്കാൻ വേണ്ടത് ചെയ്യണം. ഞാനുൾപ്പടെ ആരും വിമർശനത്തിനു അതീതരല്ല. പക്ഷെ, അത് ചെയ്യുമ്പോൾ ചെയ്യുന്നവർ പാലിച്ചിരിക്കേണ്ട സാമാന്യമര്യാദകൾ വെബ്സൈറ്റ് ഉറപ്പാക്കേണ്ടതുണ്ട്.  ചന്തസംസ്കാരത്തിനൊക്കെ മറുപടി പറയാൻ കഴിയില്ലല്ലോ?  അഡ്മിനുകൾ ഇക്കാര്യം ശ്രദ്ധിക്കുമല്ലോ?  

"വിരലിലെണ്ണാവുന്ന തെക്കുള്ളവർ, വെറുതേ ഒരു തെക്ക് വടക്ക് ശീതസമരം പടച്ചുണ്ടാക്കി തെക്കൻ ചിട്ടക്ക് അരങ്ങൊരുക്കാൻ പറ്റുമോ എന്ന് നോക്കുന്നതാണ്'' എന്നാണു, എണ്ണാൻ കഴിയാത്തത്ര കലാകാരന്മാരുള്ള ഏതോ നാട്ടിൽ നിന്നും ഒരു സുഹൃത്ത്  മുകളിൽ  എഴുതിയിരിക്കുന്നത്. അദ്ദേഹത്തിൻറെ ഭയാശങ്കകൾ മാറ്റാനായി മാത്രം ഇത് കുറിക്കുന്നു.
 
സുഹൃത്തേ, ഭയപ്പെടേണ്ടതില്ല, തെക്കൻചിട്ടക്ക് അരങ്ങൊരുക്കാൻ ഞാനോ ഇവിടെ എഴുതുന്ന ചുരുക്കം ചിലരോ വിചാരിച്ചാൽ ഒന്നും നടക്കില്ല. ഞങ്ങളുടെ നാട്ടിൽ അന്തസ്സായി കഥകളി കളിച്ചിരുന്ന ഗംഭീരാശയന്മാരെല്ലാം മണ്മറഞ്ഞു പോയി. അവരിൽ നിന്നും ചിലതൊക്കെ അറിഞ്ഞും പഠിച്ചും വളർന്നു വന്ന അടുത്ത തലമുറക്കാണെങ്കിൽ കഥകളിയെക്കാൾ താത്പര്യം, അതിന്റെ മാർക്കെറ്റിങ്ങിൽ ആയിപ്പോയി. അത് ഏറ്റവും ഭംഗിയായി പ്രയോഗിക്കാൻ എവിടെ നിൽക്കണം, ആരെ പിടിക്കണം എന്നൊക്കെ അവർക്കു ശരിക്കും അറിയാം. ഇന്നത്തെ ഒരു കാലാവസ്ഥയിൽ കഥകളിയിൽ വല്ലതും ഒക്കെ ആകണമെങ്കിൽ അതിനു പറ്റിയ വളക്കൂറുള്ള മണ്ണ് വടക്കാണ്‌ എന്ന് മനസ്സിലാക്കി മിടുക്കന്മാരെല്ലാം മനസ്സുകൊണ്ട് വടക്കൻ കൂടാരങ്ങളിൽ ചേക്കേറിക്കഴിഞ്ഞു. തെക്കൻ പാരമ്പര്യത്തെ നിരാകരിക്കയാണ് വടക്കൻ കഥകളി മനസ്സുകളിൽ എളുപ്പം കയറിപ്പറ്റാനുള്ള മാർഗ്ഗം എന്നും ഈ ബുദ്ധിമാന്മാർക്കു നന്നായി അറിയാം.
 
തെക്ക്‌ ഇനി ഒരു 'ചിട്ട' യും അടുത്ത കാലത്തെങ്ങും പച്ചപിടിക്കില്ല എന്ന് ഉറപ്പായല്ലോ? ഇതറിയാമെങ്കിൽ പിന്നെന്തിനാ ഈ കണ്ടതെല്ലാം എഴുതി കൂട്ടി ഞങ്ങളുടെയൊക്കെ വെറുപ്പ്‌ സമ്പാദിക്കുന്നേ എന്നൊരു ചോദ്യം ഉദിക്കാം. നമ്മളൊക്കെ കണ്ടും ശീലിച്ചും വളർന്നതിനോടൊക്കെ ഒരു പ്രതിബദ്ധതയും നന്ദിയും ഒക്കെ വേണ്ടേ? ഇല്ലെങ്കിൽ ആരായിട്ടും എന്ത് നേടിയിട്ടും എന്ത് ഗുണം? നിങ്ങൾ വടക്കുള്ള കലാകാരന്മാരും കഥകളി ആസ്വാദകരും നിങ്ങളുടെ പൈതൃകത്തോട് കാണിക്കുന്ന ഒരു സ്‌നേഹം ഉണ്ടല്ലോ, അതു ഞാനും എന്റെ പൈതൃകത്തോട് കാണിക്കുന്നു. അത്രമാത്രം. മറ്റു താത്പര്യങ്ങൾ ഒന്നും ഇല്ലാത്തത് കാരണം മനസ്സിൽ തോന്നുന്നത് മറച്ചു പിടിക്കാതെ എഴുതുന്നു. അല്ലാതെ 'തെക്കൻചിട്ടക്ക്' അരങ്ങൊരുക്കാം എന്നുള്ള വ്യാമോഹം ഒന്നും എനിക്കില്ല സുഹൃത്തേ!
 
കോട്ടയം കഥകൾ ചിട്ടപ്പെടുത്തിയിട്ടുള്ളത് ശരിയല്ല, അതെല്ലാം ഒന്ന് ശരിയായി ചെയ്തു ഡോകുമെന്റെഷൻ ചെയ്തു വക്കണം എന്നും പറഞ്ഞ് നാളെ ഒരു കൂട്ടം ലോക്കൽ കലാകാരന്മാരും സാഹിത്യ പണ്ഡിതന്മാരും തിരുവന്തപുരത്ത് ശിൽപ്പശാല നടത്തി ആ 'ചരിത്രസംഭവത്തെ' ലോകസമക്ഷം അവതരിപ്പിച്ചാൽ, ആ അമാന്യതയോട് പ്രതികരിക്കാനും നിങ്ങൾക്കൊപ്പം ഞാനും ഉണ്ടാകും. ഒരു സംശയവും വേണ്ടാ. അതുവരെ ഗംഭീരാശയന്മാരായ 'സന്താനരാമ' ന്മാർക്കു വേദി വിട്ടു കൊടുത്ത് കൊണ്ട് അൽപ്പാശയനായ ഞാൻ അരങ്ങു വിടട്ടെ. ഇനിയുള്ള കാലം അവർക്കുള്ളതാണ്‌!

താങ്കളുടെ അഭ്യര്ത്ഥനക്ക് മുൻപ് തന്നെ ഞാൻ ശ്രീ. ഗോപിക്കുട്ടൻ ആശാനോട് സംസാരിച്ചിരുന്നു. അദ്ദേഹത്തിനു പനിയും കലശലായ throat infection ഉം കാരണം അന്നത് പാടി റെക്കോർഡ്‌ ചെയ്യാൻ കഴിഞ്ഞില്ല. ഇനി ശ്രമിക്കാം. അദ്ദേഹം സംഗീതപരമായി പറയുന്ന കാര്യങ്ങൾ അതുപോലെ മറ്റുള്ളവരിൽ എത്തിക്കാൻ എനിക്ക് കഴിയുമോ എന്നുള്ള ശങ്കയും ഉണ്ട്. ഈ വിഷയം അദ്ദേഹത്തിൽ നിന്ന് തന്നെ നേരിട്ട് ഗ്രഹിക്കാനും കഴിയും. ഫോണ്‍ നമ്പർ അദ്ദേഹത്തിൻറെ പ്രൊഫൈലിൽ കൊടുത്തിട്ടുണ്ട്. ആര്ക്കും വിളിക്കാവുന്നതെയുള്ളൂ. ആത് പാടിക്കെൽപ്പിക്കുന്നതിൽ അദ്ദേഹത്തിനു സന്തോഷമേ കാണൂ.