വിരലുകളെല്ലാം ഉള്ളപ്രകാരം തന്നെ നിവർത്തിവെക്കുക. തള്ളവിരൽ മറ്റുവിരലുകളോടു ചേർക്കാതെ അകറ്റിപ്പിടിക്കുക. ഹംസപക്ഷം എന്ന മുദ്ര ആയി.
താണുനിന്ന് കാട്ടുന്ന സംയുതമുദ്ര.
ഇരുകൈകളിലേയും ഹംസപക്ഷം മലർത്തിമാറിനുമുന്നിൽ പിടിച്ച് അൽ‌പ്പം താഴേയ്ക്കമർന്ന് ചുഴിച്ച് വലതുവശത്തെത്തി ഇരുകൈകളിലും കർത്തരീമുഖം പിടിയ്ക്കുക. വലത്തുനിന്ന് ഇടത്തേയ്ക്ക് ചലിയ്ക്കുന്നതൊനൊപ്പം കൈകളിൽ കർത്തരീമുഖം വിട്ട് ഹംസപക്ഷമാക്കുക. ഇത്പോലെ തന്നെ ഇടത് വശത്തേക്കെടുത്തും ഈ മുദ്ര കാട്ടാവുന്നതാണ്.
ചവുട്ടിച്ചാടി കാണിക്കുന്ന സംയുതമുദ്ര.
നെറ്റിയ്ക്കു മുന്നിൽ ഇരുകൈകളും കൂപ്പിപ്പിടിച്ച് കൈകൾ ഇരുവശത്തേയ്ക്കും അകറ്റി ഇടംകയ്യിൽ സർപ്പശിരസ്സും വലം കയ്യിൽ പതാകവും പിടിയ്ക്കുന്നു.
താണുനിന്ന് കാട്ടുന്ന അസംയുതമുദ്ര.
വലം കൈ ഹംസപക്ഷം മാറിനു മുന്നിൽ നിന്ന് താഴേക്കൂടി ചുഴിച്ച് വിരലുകൾ മുകളിലേയ്ക്ക് വരും വണ്ണം ഇടത്തെ മാറിന് മുന്നിലെത്തി മുദ്രാഖ്യം പിടിച്ച് വിരലിളക്കി വലത്തേയ്ക്ക് നീക്കി വലത്തെ മാറിനു മുന്നിലെത്തുമ്പോൾ മൃഗശീർഷം പിടിച്ച് മുദ്ര അവസാനിപ്പിക്കുന്നു.
താണുനിന്ന് കാട്ടുന്ന സംയുത മുദ്ര.
മാറിനു മുന്നിൽ പിടിച്ചുവലംകയ്യിലെ ഹംസപക്ഷം ചെറുചുഴിപോലെ വലത്തെയ്ക്ക് നീട്ടി മുദ്രാഖ്യം പിടിച്ച് വിട്ട് സൂചികാമുഖമാക്കുന്നു.
താണുനിന്നും കാണിക്കുന്ന സംയുതമുദ്ര.
മാറിനു മുന്നിൽ അടുപ്പിച്ചു പിടിച്ച ഹംസപക്ഷങ്ങൾ ഇരുവശത്തേയ്ക്കും അല്പമകറ്റി കൈത്തലങ്ങൾ പരസ്പരം അഭിമുഖം വരുമാറ് ചെരിച്ച് മുദ്രാഖ്യം പിടിച്ച് ഒടുവിൽ വിട്ട് ഹംസപക്ഷമാക്കുക.
താണുനിന്നു കാട്ടുന്ന സംയുതമുദ്ര.
മാറിനുമുന്നിൽ കമിഴ്ത്തിപ്പിടിച്ച ഇരുകയ്യിലെയും ഹംസപക്ഷങ്ങൾ താഴെയ്യ്കെടുക്കുമ്പോൾ ചൂണ്ടുവിരൽ അൽ‌പ്പം അയച്ചുപിടിച്ച് മുഷ്ടിയോടെ മലർത്തി കൈക്കുഴ ഇളക്കി സാവധാനം മാറിനു മുന്നിലേയ്ക്ക് ഉയർത്തി നിർത്തുക.
ചവിട്ടിച്ചാടി കാട്ടുന്ന സംയുതമുദ്ര.
ഇടത്തെ കയ്യിൽ മാറിനുനേരെ ഉള്ളിലേയ്ക്കാക്കി മുഷ്ടി പിടിയ്ക്കുക. വലത്തെ കയ്യിലെ ഹംസപക്ഷം അതിനെ അടിയിലൂടെ ചുഴിച്ചെടുത്ത് നെറ്റിക്ക് മുന്നിൽ കൊണ്ട് വന്ന് മുദ്രാഖ്യം പിടിച്ച് അത് വിട്ട് ഹംസപക്ഷമാക്കുക.
താണ്‌ നിന്ന് കാട്ടുന്ന സംയുതമുദ്ര.
ഇരുകയ്യിലേയും ഹംസപക്ഷങ്ങള്‍ മാറിനു മുന്നില്‍ മലര്‍ത്തി പിടിച്ച് ഇരുവശത്തേക്കും വൃത്താകൃതിയില്‍ ചുഴിച്ചെടുത്ത് കമഴ്ത്തിയ പതാകം കൊണ്ട് പാദം എന്ന് കാട്ടുക. ഇടം കയ്യിലെ വര്‍ദ്ധമാനകം ചെറുതായി ചുഴിച്ച് ഇടത്തെ ഉപ്പൂറ്റി എന്നും അത് പോലെ തന്നെ വലം കയ്യിലെ വര്‍ദ്ധമാനകം ചെറുതായി ചുഴിച്ച് വലത്തെ ഉപ്പൂറ്റി എന്നും കാട്ടുക.
താണ്‌ നിന്ന് കാട്ടുന്ന സംയുതമുദ്ര.
ഇരുകയ്യിലേയും തള്ളവിരലുകള്‍ കൊണ്ട് മാറിനു മുന്നില്‍ സ്തനത്തിന്റെ വൃത്താകൃതിയില്‍ ചുഴിച്ചെടുത്ത് ഇടം കയ്യിലെ ഹംസപക്ഷം വിരലുകള്‍ ഇളക്കിക്കൊണ്ട് സ്തനാകൃതിയില്‍ ചുഴിക്കുകയും ഒടുവില്‍ സ്തനത്തിന്റെ വലിപ്പം സൂചിപ്പിച്ച് അവസാനിപ്പിക്കുകയും ചെയ്ത് ഇതെല്ലാം വലത് വശത്തും പിന്നീട് ഇരുകൈ കൊണ്ട് ഒരുമിച്ചും ചെയ്ത് ലജ്ജയോടെ നില്‍ക്കുക.
താണ്‌ നിന്ന് കാട്ടുന്ന അസം‍യുത മുദ്ര.
വലത്തെ കയ്യിലെ ഹംസപക്ഷം വലത്തെ കണ്ണിനു മുകളില്‍ പുറത്തേക്ക് പിടിച്ച് ദേഹം ഇടത്തോട്ട് ഉലയുന്നതോടൊപ്പം വലം കൈ ഉള്ളിലെക്ക് തിരിച്ച് കടകം പിടിക്കുകയും കിടന്നുറങ്ങുന്ന ഭാവത്തില്‍ കണ്ണടക്കുകയും ചെയ്യുന്നു.