ശ്രീരാമൻ പിൻവലിഞ്ഞ് ഹനൂമാനെ പറഞ്ഞയക്കുന്നു. ഹനൂമാന്റെ തിരനോക്കിനുശേഷം ഹനൂമാൻ ബാലകർ ആരാണെന്ന് മനസ്സിലാക്കുന്നു. ബാലകന്മാരോടു കൂടെ ഹനൂമാൻ യുദ്ധമെന്ന പേരിൽ അൽപ്പം കളിക്കുകയും ബന്ധനസ്ഥനാവുകയും ചെയ്യുന്നു. ബന്ധിക്കപ്പെട്ട ഹനൂമാനെ കൗതുകം കൊണ്ട് ബാലന്മാർ അമ്മയുടെ സമീപം കൊണ്ട് ചെല്ലുന്നു. ഇത്രയുമാണ് ഈ രംഗത്തിൽ ഉള്ളത്.

ഈ രംഗത്തിൽ കീഴ്പ്പടം കുമാരൻ നായർ, ഹനൂമാൻ വേഷത്തിൽ, ബാലന്മാരുമായി അഷ്ടകലാശം എടുത്തായിരുന്നു യുദ്ധം നടത്തിയിരുന്നത്.

ശത്രുഘ്നൻ തോറ്റ് ഓടിയപ്പോൾ തന്നെ കുതിരയ്ക്കായി ആളുകൾ ഇനിയും വരും എന്ന് ബാലന്മാർക്ക് ധാരണയുണ്ട്. അതിനാൽ അവർ വനത്തിൽ തന്നെ കുതിരയെ ബന്ധിച്ച് അവിടെ തന്നെ മറഞ്ഞ് ഇരിക്കുകയാണ്. പിന്നാലെ ലക്ഷ്മണൻ വരുന്നു. ലക്ഷ്മണനും തോറ്റോടിയപ്പോൾ സാക്ഷാൽ ശ്രീരാമൻ തന്നെ ബാലന്മാരെ നേരിടാൻ വരുന്നു. കൗതുകത്തോടെ ബാലന്മാരോട് യുദ്ധം ചെയ്ത് തോറ്റതായി നടിച്ച് പിൻവാങ്ങുന്നു. ബാലന്മാർ വീണ്ടും വനത്തിൽ തന്നെ ഒളിഞ്ഞ് ഇരിക്കുന്നു.

കുതിരയെ മോചിപ്പിക്കാനായി ലക്ഷ്മണൻ എത്തുന്നു. ലക്ഷ്മണനും തോറ്റ് പിൻവാങ്ങുന്നു.