വട്ടംവച്ചും താണുനിന്നും കാൽകൂട്ടിനിന്നും കാട്ടാവുന്നതും വലംകൈകൊണ്ടു മാത്രം കാട്ടുന്നതുമായ അസംയുതമുദ്ര.

വലംകയ്യിലെ സൂചികാമുഖം തിരശ്ചീനമായി പിടിച്ച്, ഇടതുവശത്തുനിന്ന് മുന്നിലുടെ വലതുവശത്തേക്ക് വൃത്താകൃതിയിൽ ചലിപ്പിച്ച് വലതുവശത്തുകൂടി മുന്നിലേക്കെത്തി അവസാനിപ്പിക്കുന്നു.

കാൽ കൂട്ടിനിന്നും താണുനിന്നും കാട്ടാവുന്ന സംയുതമുദ്ര.

ഇരുകൈകളിലും മൃഗശീർഷമുദ്ര (നാട്യശാസ്ത്രം - തള്ളവിരലും ചെറുവിരലും ഉയർത്തി, മറ്റുവിരലുകള് കുനിച്ചുപിടിച്ചാൽ നാട്യശാസ്ത്രപ്രകാരമുള്ള മൃഗശീർഷം) വലംകയ്യിൽ കമഴ്ത്തിയും ഇടംകയ്യിൽ മലർത്തിയും പിടിച്ച് വലതുവശം മുന്നിലേക്കും ഇടംകൈ കമഴ്ത്തിയും വലംകൈ മലർത്തിയും പിടിച്ച് ഇടതുവശം മുന്നിലേക്കും അങ്ങനെ വലത്തേക്കും ഇടത്തേക്കും പലതവണ ചലിപ്പിച്ച്, വലത്തേക്കു ചലിപ്പിച്ച് അവസാനിപ്പിക്കുക.

ഇടത്തേക്കു തൂക്കിവച്ചുചവിട്ടി ഇടംകൈകൊണ്ടും വലത്തേക്കു തൂക്കിവച്ചുചവിട്ടി വലംകൈകൊണ്ടും കാട്ടാൻ കഴിയുന്ന അസംയുതമുദ്ര.

ഇടംകൈകൊണ്ടു കാട്ടുമ്പോൾ, വലംകൈ മലർത്തി വലതുവശത്തേക്ക് നീട്ടിപ്പിടിച്ച്, ഇടംകയ്യിലെ മൃഗശീർഷം (നാട്യശാസ്ത്രം - തള്ള വിരലും ചെറുവിരലും ഉയർത്തിപ്പിടിച്ച് മറ്റു വിരലുകൾ കുനിച്ചു പിടിക്കുക) കമഴ്ത്തി മാറിനു മുന്നിൽ പിന്നിലേക്കും മുന്നിലേക്കും ചലിപ്പിക്കുന്നത്.